Tocat a sutalineare chi is controllos s’ant a fàghere in modu voluntàriu e ant a èssere gratùitos, annotamala ant a pòdere partetzipare petzi is indivìduos dae is deghe annos in susu.

Ma comente at a èssere fata custa indàgine epidemiològica e cales ant a èssere is modalidades? Provamus a fàghere unu pagu de craresa.

Ant a èssere impreados is tampones lestros e is sugetos resurtados negativos ant a repìtere sa proa a pustis de una chida. Custu pro aumentare is probabilidades de agatare eventuales positividades a su Covid-19. Mentras cussos chi resurtarent positivos a sa prima proa diant èssere sutapostos a su tampone molecolare.

In Ogiastra si pensat de controllare 50 mìgia persones, ma su nùmeru beru at a dipèndere dae  is adesiones de is tzitadinos.

In custos meses est istadu mannu a beru su traballu fatu dae s’USCA de Barì, chi est chessida a isulare medas focus de infetzione in diversas biddas ogiastrinas. Unu traballu notèvole e un’esperièntzia in su campu de sa cale nd’at a pòdere tènnere profetu sa Regione Sardigna.

Posca at a èssere aviada sa campagna in larga iscala pro sa cale su Guvernadore Solinas at ordinadu duos milliones de test. Galu non s’ischit comente e in cantu tempus at a èssere controllada totu sa populatzione de s’Ìsula.

Pro coordinare custu pianu est istadu nominadu su professore Andrea Crisanti, viròlogu afirmadu de sa comunicatzione sientìfica e de s’istrategia anti-contàgiu de su coronavirus. Su professore Crisanti at ispiegadu chi controllos e vatzinos sunt cumplementares, depent intervènnere paris, comente in una manovra a tonalla contra su virus.

Su 27 de nadale sunt istadas sumministradas is primas 180 doses de vatzinu contra su Covid arribbadas sa note prima a s’aeroportu de Su Masu/Elmas.

Is primos a si sutapònnere a su vatzinu est istadu su personale de su Brotzu, de su Santìssima Trinidade de Casteddu e de su Policlìnicu universitàriu de Pauli/Monserrato. Su 31 imbetzes sunt arribbadas medas prus doses: 4800 ampudditas.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22