Custu mangianu sos Carabineris de su Nùcleu Operativu e Radiomòbile de su Cumandu Cumpangia de Santu ‘Idu, ant arrestadu a S. L., un’òmine de 40 annos originàriu de s’Ogliastra, cun pretzedentes e sena abitòriu fissu.

Sos militares in su cursu de unu servìtziu miradu a sa preventzione de s’ispatzu de droga in sa localidade Olia Speciosa de sa Comuna de Castiadas, ant notadu sos movimentos pagos craros de s’òmine e chi a pees esnt intradu in unu caminu de su sartu.

Una verìfica prus aprofundida at induidu sos Carabineris a fàghere una percuisitzione chi at cunsentidu de agatare 1 kg de marijuana chi s’òmine teniat cuada in una bursa. Su cuantitativu de droga est istadu deretu sutapostu a secuestru.

S’òmine est istadu acapiadu pro detentzione de droga pro s’ispatzu e a s’acabbu de sos atzertamentos de ritu acanta su Cumandu Cumpangia de Santu ‘Idu at a bènnere tratentu insos aposentos de seguridade de su cumandu comente dispostu dae s’Autoridade Giuditziària de Casteddu, in isetu de su ritu deretu chi at a èssere tzelebradu in sa die de cras.

Tribulìa in sa plaja in Casteddu: piccioccu de seighi annos agattadu mortu pustis de una festa a denotte.

Un festa in atta ‘e mare est finida in sa manera pius drammatiga. Est ancora imboddicada in su misteru sa morte de Mariano Olla, 16 annos, naschidu in Casteddu, ma chi dae carchi annu bistaiat in Sestu, su corpus de su cale est bistadu acciappidu a s’arbeschida de dominiga 15 de lampadas in sa plaja intre su portu de Su Siccu e sa passizzada scalu de Sant’Elia.

A iscoperrere su corpus, a deghe metros dae sa riva, sunt bistados piscadores e zente chi faghiat su bagnu in cussu logu. In presse meda sunt arrivados sos Viglies de su Fogu po su recuberu de su corpus, sighidu dae s’arribu de sa politzia e de su 118, chi ant potidu solu cunfirmare chi su zovanu fit mortu. Su piccioccu teniat ancora sas iscarpas e sos pantalones curtzos, ma non teniat sa maglia. No presentaiat sinzos de violentzia.

Secundu sos primos pensamentos, intre su notte bi diat essere bistada una festa propriu in cussa plaja pitticca e franta, pagu attesu dae su coro de sa “movida” de sos zovanos de su portu turisticu de Su Siccu. Addurat peroe de accrarare si Mariano esserat deabberu intre sos partetzipantes a sa festa e, si custu est beru, itte potat essere capitadu in sas oras imbenientes.

Sa plaja in sa cale est bistadu agattadu su corpus, una limba de rena pitticca in daesegus de su molu de su portu, si podet segudare dae una caminera de terra chi partit dae su parchizu Coro, su mattessi impittadu dae sos tiffosos po sas partidas a sa Unipol Domus, s’Istadiu de su Casteddu. A curtzu si agattant puru s’istadiu bezzu e su Lazzaretto. Sa Politzia at fattu partire sas scruccullas po accrarare sos motivos de sa morte. Sunt gia bistados iscurtados sos familiares de su piccioccu e si est chircande de torrare a fraigare sas urtimas oras de sa vida sua.

Unu puntu de fundamentu de s’iscrucculla at essere de cumprendere si su piccioccu si siat istesiadu a sa sola, si si siat intesu male, o si bi siant bistados elementos de arriscu in sa serana. At essere importante sa resessia de lotomia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22