Protagonista de s’istajone de fùbalu in pessu acabada, su campu isportivu foghesinu “Su Pruineddu” est oramai a s’abbandonu: ghennas de sos ospogliatoojos isparrancadas, grifones chi perdent, cuadru de sas lughes abertu, arga in sas tribunas. Chie bolet, a de die e a de note tenet lìberu atzessu a s’istrutura.

Non solu s’atleta zelante si podet allenare fintzas in oràriu noturnu illuminende su campu a die cun sos faretos ma fintzas su vàndalu de turnu chi bolet fàghere essire de sas càscias cumonales carchi èuru in prus, podet alluere a praghere suo sas lughes o abèrrere totus sos rubinetos de s’abba. Su problema, prima chi divenat crìticu, andat risòlvidu. E l’ischint bene fintzas in su palatzu tzìvicu foghesinu. S’assessore Daniele Murgia non sutavalutat su problema. “Amus a agire cantu prima pro sistemare su prus pressisu” narat.

Fidutziosu fintzas su vitze sìndigu Tonio Palmas. “Pro acontzare sas tancaduras e sas pèrdidas serbit unu traballu de mesu giorronada” ispiegat s’amministradore chi agiunghet: “Tra pagu ant a partire sos traballos de ammodernamentu de s’impiantu”. Sos interventos pro una retzintzione noa e pro sistemare su mantu de su campu isportivu, francu novidades de s’ultimora, ant a cumentzare deretu. Valentina Prunas dirigente de su Foghesu Calcuo, connoschet bene sas crititzidades de “Su Pruineddu”.

“In isetu de s’interventu de sos manutentores – sutalìniat-cunfido in su bonu cumportamentu de sas persones. Si una cosa no est mea e mi la donant in prèstidu chirco de la tratare a su mègius de sas possibilidades meas”. E continat in sa chi est una bera e pròpia letzione de edicatzione tzìvica .“Sas persones tratant su bene comunu comente una cosa de pagu contu. Custu no andat bene, bidu chi sa situatzione de oe de su campu isportivu est frutu fintzas de paga educatzione” e at concruidu “so aconcada chi cun s’agiudu de su Comunu, chi at postu a disponimentu su dinare pro sistemare s’istrutura, s’ant a chessire a fàghere cosas bonas meda”.

Su chervu sardu cona de una torrata a nachere de s’ambiente.

Su chervu sardu, connoschidu iscientificamente commente Cervus elaphus corsicanus, est una de sas castas pius ammaghiantes e de signifficu de sos animales de sa Sardigna. Tippicu de s’isula e de sa Corsica, custu animale si annodittat po sas mesuras prus pitticcas in cunfrontu a su chervu europeu e po su abbrigu fuscu chi cambiat tonalidade cun sas istajones. Po seculos at bividu in sos buscos e in sas magras mediterraneas de s’isula diveninde parte de sa bista naturale e de sa cultura locale.

In su Noighentos su chervu sardu at arriscadu de si estinghere pro more de sa cazza estremada e de sa minimada de sos logos in sos cales biviat. A sa fine de sos annos Sessanta nde adduraiant solu pagas chentinaias de tipos cuncentrados mescamente in sa parte de bassu de s’isula. Dae cussu mamentu sunt bistados incumintzados programmas importantes meda de tutela e accreschimentu chi ant permittidu a s’ispecie de torrare a occupare zuras mannas de sa Sardigna.

Oe su chervu sardu est presente in medas zuras de sos montes e corongias commente su Sulcis,su Sarrabus,S’Ozzastra e su Gennargentu. Bivet in logos riccos de buscos de elighes e magras mediterraneas, inube agattat furriadorzu e cosa de pappare. Pappat meda erba, fozzas,chimizones e fruttos,isboddiande unu rolu de fundamentu in s’ecchilibriu de sos ecosistemas forestales.

Una de sas cosas pius ammaghiantes de sa vida de su chervu sardu est su tempus de sos amores chi est in attonzu. In custa fase sos mascros bogant a fora boghes potentes po giammare sas feminas e appartare sos atteros mascros. Custu fenomenu nadurale faghet arrivare donz’annu appassionados e istudiosos, apparande un’ispettaculu unicu in sos buscos sardos, de cuntattu mannu.

Sa torrada de su chervu sardu no est solu unu sutzessu biologicu, ma puru unu signale importante po cunservare s’ambiente. Sa presentzia sua cunfirmat sa salude bona de sos ecosistemas e dat unu contribbudu a sa balorizzatzione su patrimoniu naturale de s’isula. In medas zuras su chervu est divennidu fintzas unu elementu de attrassione po su turismu naturalisticu e de ecchilibriu ecologicu. Subra de custa ispecie sunt bistados pubbricados puru paritzos libros fotogiornalisticos dae domos sardas chi lu cheriant evidentziare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22