Unu cane de ratza labrador est istadu mortu in su sartu de Foghesu, cun unu corfu de fusile. Iscoberta mala fata in sa zona “Su cungiau de is Morus”, in ue sa pòbera bèstia est istada difatis agatadu mortu a balla.

In logu in ue s’animale est istadu agatadu sunt lòmpidos is carabineris de sa Cumpangia de Iersu, avisados dae sa maere de su cane, e unu veterinàriu de s’ASSL de Lanusè chi at atzertadu sa presèntzia in s’ispèigu de s’animale is istampos causados dae sa fusilada.

Sa giustìtzia est faghende indàgines pro agatare s’autore de custu reatu chi podet costare caru a su responsàbile.

Su sòtziu culturale s’Imbentu, su 2 de Onniasantu, in ocasione de sa die dedicada a is mortos, aparitzat peri ocannu sa manifestatzione a tìtulu “Is Animeddas”. A pustis de Lanusè e de Irbono, ocannu s’ispetàculu, fatu pro is pipios e pro is mamas e is babbos issoro, at a èssere fatu in Elini, in su Tzentru de Agregatzione Sotziale de su Comunu, ma comente a semper ant a pòdere partetzipare finas is pitzocheddos de is biddas a probe. Custu su programma:

–          Projetzione de su documentàriu in sardu dedicadu a s’orìgine de sa festa de is mortos;

–          Projetzione de su contu “Su libru maladitu”

–          Giogos pro minores: sa Tòmbola de is Animeddas, su Dòminu de is Ànimas e su Memory in sardu.

Sa manifestatzione, a sa cale s’at a pòdere leare parte sena pagare, at a cumentzare a is 5 de merie. A sa concruia de sa festa a totus ant a èssere regalados donos, durches e de ogna casta.