Mangones a su parcu de Molentargius, incuminzada sa criada.

Est incumintzada in sas dies passadas s’istajone de sa criada de sos mangones in sa zura de su Parcu Naturale regionale Molentargius-Saline. In su Bellarosa Maggiore sunt bistadas iscrudignadas casi 1.500 cropas mentres in s’istagnu si pensat chi bi siant in tottu casi 10.000 mangones. In custas chidas si tribagliat non solu a su compidu de sos puzzones, ma fintzas a su compidu de sos livellos de s’abba pro favoressere sas criadas. S’abba chi est rutta in sos mesese passados at fattu accreschere meda su livellu de s’abba, minimande sas zuras fora de s’abba inube sos mangones faghent sos nios.

Pro mezorare sa situassione su personale de su Parcu est faghinde supra paratoias e impiantos pro pesare s’abba. Sunt bistadas attivadas fintzas pompas chi iscarrigant s’abba in su canale La Palma ma s’abba chi est proinde no at ancora permittidu de arribare a risurtados chi si biant. Su compudu de sa colonia est affidadu a sos ornitologos incarrigados dae su Parcu chi sighint donzi momentu comente est andande s’istajone. In sos annos passados sa criada incumintzaiat intre fine frearzu e fine aprile e duraiat casi unu mese. Fintzas cust’annu sa colonia diat podere creschere in sas chidas imbenientes.

Cun sa minimada de sas temporadas e s’accreschimentu de sas temperaduras si prevedit chi sos argines ant a torrare disponibbiles faghinde divennere prus fatzile sas criadas. Secundu sos espertos, su ritardu de sos mangones no est una cosa negativa. Sos livellos artos de s’abba podent difattis favoressere atteras castas comente s’Avocetta e sos Gabbianos arrubios chi in sos urtimos annosa ant tentu prus pagu logu pro sa presentzia de sos mangones.

Su Parcu est unu de sos logos prus importantes pro sa biodiversidade in Sardigna e donz’annu attirat s’attentzione de istudiosos, appassionados e bisitadores. Sa presentzia de sos mangones impare a cussa de medas atteras castas cuffirmat su balore de custu ecosistema unicu. S’istajone est appena incumintzada e at a serbire isettare sas chidas imbenientes pro cumprendere comente ant accreschere sas criadas. Sas cundissiones de su tempus ant a tennere unu rolu detzisivu, ma su
tribagliu de controllu at a sighire pro garantire un’ambiente acciu a sos puzzones e a sa rimunida de sa natura.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22