Passizeris italianos inciassados in Dubai: si chircant bolos po los faghere torrare.

Sunt 563 sos italianos chi si acciappant ancora supra de sa Msc Crociere frimma in su portu de Dubai. Intre issos bi est una truma pitticca de deghe pessonas chi arribant dae Casteddu. Sa cumpanzia est chircande de ordiminzare sa torrada in Italia su prima possibbile, tribagliande po agattare bolos disponibbiles chi pottant faghere torrare a domo tottus sos passizeris.

Po custu motivu sunt bistadas cuntattadas medas cumpanzias aereas internatzionales. S’intentu est de agattare postos supra bolos de linea po permittere a sos passezeris de dassare Dubai e torrare in sos paisos insoro. Intamen sa situassione no est simple e dimandat tempus, pro itte sos collegamentos aereos in cussa zura sunt torrande a incuminzare e sos postos non sunt meda.

Secundu cantu comunicadu dae sa cumpanzia, supra sa nave sa situassione est tranchilla.Sos passezeris istant bene e sighint a rezzire novidades supra su chi est sutzedinde e s’iscumbattu  de ordiminzare sa torrada. In su mentres podent impittare tottu sos servitzios chi bi sunt in sa nave. S’assistentzia a sos passezeris sighit a essere garantida. Sas difficultades printzipales sunt propriu so s’ordimizzasione de sos bolos.

Carchi cumpanzia aerea at pigadu sos collegamentos in sa zura, ma est favoressende sos passezeris chi aiant giai prenotadu sos bolos prima de sos atteros. Custu cheret narrere chi chie teniat prenotassiones fattas dae pagu deppet isettare prus tempus po agattare unu postu disponibbile. Pro custu motivu sa torrada de tottus sos crocieristas dimandat prus dies de su chi si prenettaiat.

Po chircare de essere prus fusidos, sa cumpanzia est baludande fintzas attera solutziones possibbiles. Intre custas bi est s’idea de ordiminzare bolos ispeciales dedicados a sos passezeris de sa nave. Custos bolos diant podere partire non solu dae Dubai, ma fintzas dae atteros aereoportos accanta. In su mentres si sighit a tribagliare imparis cun sas autoridades. S’intentu est de garantire una torrada limpia e sigura po tottu sos passezeris.

In sas dies imbenientes si at a cumprendere menzus cando ant a podere partire sos primos bolos e cando sos biazzadores ant a resessire a torrare a domo.

 Attività realizzata col contributo della Regione Sardegna — IMPRENTAS 2025-2026. LR 22/2018, art. 22

SoloWomenRun, record de iscrissiones in Casteddu: 16miza feminas a sa cursa non cumpetitiva.

Galabera manna po sa SoloWomenRun, sa cursa dedicada a sas feminas chi bi at essere dominiga in Casteddu. S’edissione de cust’annu at giai fattu sinzare unu resurtadu importante meda: sa cursa non cumpetitiva, at apperricadu su numeru massimu de partetzipantes cun 16miza feminas iscrittas.

Su record est fintzas de sas truppas iscrittas. Cust’annu, difattis, ant a partetzipare a sa cursa casi 55 isquadras e truppas de amigas chi ant detzisu de partetzipare imparis a sa die. So ordiminzadores sunt cuntentos meda de sa respuindida de su pubbricu e sunt giai pensande a sa cursa imbeniente. S’intentu po su tempus benidore est meda prus agudissiosu: arrivare a 20miza partetzipantes e rendere sa manifestassione meda prus manna e partetzipada.

Addia de sa cursa at essre fintzas una die de festa. S’abbenimentu est pensadu po faghere bistare impare feminas meda e bivere unu manzanu faghinde isport, cun divertimentu e cundivisione. In su mentres de sa die bi ant essere musica, animassione e mamentos de intrattenimentu chi ant  accumpanzare sas partetzipantes prima e pustis de sa cursa.

A sa manifestassione bi ant essere feminas de donzi edade. S’etade media at essere de 46 annos, ma intre sas iscrittas bi sunt fintzas piccioccas zovanas meda e feminas prus mannas. Medas de sas chi ant a partetzipare arribant dae Casteddu e dae sa zura metropolitana, ma sa cursa muttit fintzas medas feminas dae atteras zuras de sa Sardigna.

Prus de sa metade de sas iscrittas, difattis, arribat dae iscroccas comente Sulcis, Aristanesu e Ozzastra. Custu mustrat cantu sa manifestassione siat connoschida in tottu s’isula.

No ant a mancare nemmancu sos partetzipantes chi arribant dae su restu de Italia. Casi 50 feminas ant  arrivare dae divressas regiones italianas pro partetzipare a sa cursa. A custas si azzunghent fintzas una deghina de feminas chi ant arribare dae forastigu.

Su caminu de sa cursa at a partire dae intro sa Fiera de Casteddu. Sas partetzipantes ant a passare in sas bias e pratas connottas meda prima de arribare a sa fine in prata Marco Polo. Pro chie partetzipat a sa gara cumpetitiva, su caminu at essere prus longu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22