Mortoriu pustis de sa festa, un’omine de 26 annos cundennadu a 14 annos po su mortoriu de Assemini.

Si serrat cun d’una cundenna a 14 annos de presone su protzessu a carrigu de s’omine de 26 annos chi aiat cunfessadu su mortoriu de Alessandro Cambuca, s’omine de 27 annos mortu cun paritzos corpos de burteddu in su mese de Santu Aini de su 2024 in Assemini, in sa tzittade metropolitana de Casteddu. Su mortoriu fuit bistadu fattu intro de una domo inube su mortu e su chi l’at mortu fuint passande sa notte imparis cun atteros amigos, pustis de essere bistadosa sa festa de santa Greca in Decimo. Unu seru de festa chi si fuit trasformada in disgrassia in sas oras imbenientes a su cuccurale de una briga chi fuit finida cun s’affraccada mortale.

Sa sententzia est bistada fatta a s’accabbada de su protzessu tzelebradu in accurtziadu. In su cursu de s’urtima audientzia, in sa reprica, su Pubbricu Ministeru aiat dimandadu de dare un cundenna prus bassa, dae 17 annos e 4 meses a 14 annos e 8 meses. Su zuighe at istabilidu una pena de 14 annos de presone, riconnoschinde a s’imputadu sas abbrandadas cumpressivas.

Intre sos elementos cussiderados po sa detzisione bi sunt bistados sa cunfessione fatta dae su zovanu fintzas dae su primu mamentu e s’azzudu dadu a sos iscrucculladores, chi aiat permittidu de acciappare s’arma impittada po bocchire Alessandro Cambuca. Unu comportamentu chi at fittadu supra sa balutatzione de sa posissione sua in su protzessu. In su mentres de su dibattimentu, sa defensa aiat bogadu a pizu sa chistione de unu possibbile vissiu de mente a su mamentu de su mortoriu, presentande una perissia de parte secundu sa cale s’imputadu diat aere fattu in su mentres chi non fuit capatze de cumprendere e de bolere.

Una visura chi est bistada discutida in aula e at a podere essere oggettu de atteras balutatziones in sos atteros protzessos chi si ant a faghere.
Como si isettat su depositu de sas resones de sa sententzia, coladorzu de fundamentu po cumprendere in particulare sas resones chi ant giuttu a custa pena. Solu pustis de aere esaminadu sos motivos, sa defensa at a detzidere si presentare appellu contra sa cundenna de primu gradu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Tattari,issolorjada sa baby gang de Monte Rosello: arrestados duos minores, atteros chimbe scudrignados.

Sa Politzia de Istadu at postu fine a sas attividades de una farzia de minores chi, po chidas meda, at semenadu timoria intre su cuartieri de Monte Rosello e su tzentru tzittadinu de Tattari, cun d’una passada de mamentos de violentzia e crimenes contra pessones e buttegas. S’operassione est partida a s’arbeschida, cando sos politziottos ant esecutadu duos pregones de arrestu de su Tribbunale po sos minores de Tattari. Sos provvidimentos ant battidu a s’arrestu de duos zovanos, chi benint cussiderados sos caudiglios de su ballumene.

Atteros chimbe piccioccos,semper minores, sunt iscrudignados po su mattessi motivu e sunt bistados compudados. Sos aberguadores ant secuestradu cosas chi si pensat potant serbire a sas iscruccullas, cun s’intentu de torrare a fraigare in particulare sos rolos, responsabbilidades e detzisiones leadas intro de sa farzia.
Su ballumene, chi si faghiat giammare “sa farzia de su Monte”, diat aere fattu in manera istrutturada e cordinada. Sos piccioccos si moviant in ballumenes pitticcos po corpare in zuras divressas de sa tzittade, seperande zente chi cunsideraiant chidrina e faghinde a s’ispissu a daesero.

Importantes po sas iscruccullas sunt bistados sos servitzios de pidichinamentu e su controllu de sas friguras registradas dae sas telecameras chi bi sunt in medas zuras de Tattari. Gratzias a custu tribagliu pretzisu, sos politziottos sunt resessidos e torrare a fraigare paritzas iscenas chi at fattu sa farzia, evidentziande unu cuadru fattu de affraccadas, accrassaduras e furas.

Intre sas cosas cuntestadas bi sunt paritzas mazaduras, calicuna de sas cales ant intriscadu a sa zente fertas e secaduras chi che los ant fattos giughere a s’ispidale. Non solu: bi sunt fintzas accusas de molestias sessuales a paritzas piccioccas, addia accrassaduras a fedales insoro e meres de buttegas. Secundu cantu pensant sos iscrucculladores, donzi cosa diat essere bistada ordiminzada sighinde sos ordines de sos duos minores arrestados, cussiderados sos capos de su ballumene. Diant essere bistados issos a istabilire sos intentos dominande sos atteros.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22