Morta 30 annos faghet in Casteddu,su cunsillu puntat a unu mortoriu.

Trint’annos pustis de sa morte de Manuela Murgia, sa picciocca de 16 annos acciappida chentza vida in su canyon de su campusantu de Tuvixeddu in Casteddu su 5 de frearzu 1995, sa famiglia sua sighit a chircare veridade e zustissia. In primis si pensaiat chi si esseret morta, ma su casu est bistadu torradu a abberrere su 30 de martu 2025.Como est bistadu presentadu unu cunsillu novu chi negat sas congruidas de su RIS e puntat a cunfirmare chi Manuela diat podere essere bistada bocchida.

Su cunsillu de su Dr. Roberto Demontis, anatomopatologo, si cuntzentrat supra battoro puntos printzipales. Su primu po sas iscanniduras de Manuela:secundu su duttore non podent essere bistadas fattas po una rutta dae 30 metros, comente si pensaiat, e duncas s’idea chi si siat morta est meda diffitzile de creere.

Su secundu puntu pertoccat sa tzintura de sa picciocca: sa fibbia mustra sinzos de tira, comente si calicunu la diat aere tirada, e custu non diat ispiegare una rutta a sa sola. Su terzu puntu pertoccat sos oggettos pessonales de Manuela e carchi pranta acciappida accanta a su corpus: secundu Demontis non sunt coerentes cun su logu in su cale est bistadu acciappidu su corpus, e custu faghet pensare chi che siat bistadu leadu inie.

Po finire, su quartu puntu pertoccat sas iscanniduras intro de su corpus, chi secundu su duttore diant podere essere bistadas fattas cun d’unu imbestimentu de una macchina, abberinde iscenarios divressos meda dae cussu chi si pensaiat. Sa famiglia de Manuela pensat chi custos battoro puntos affortighent s’idea chi sa picciocca siat bistada morta e isperat chi custa analisi nova potat finamente faghere bessire a pizu sa veridade. Su cunsillu est unu elementu importante po faghere lughe supra una muda addurada misteriosa po trint’annos, e evidentziat comente siat ancora oe possibbile revertire pensamentos chi pariant deffinitivos.

Como sa detzisione finale est de su P.M., chi at a deppere baludare si nomenare unu super espertu po controllare un’attera borta su casu e abberguare sas ideas novas. Pro sa famiglia custu diat podere rappresentare unu passu detzisivu po alcansare rispostas, serrare unu capitulu prenu de dolore e dare zustissia a una vida zovana rugada troppu chitzo. S’isperantzia est chi, pustis de trint’annos, Manuela potat finamente tennere sa zustissia chi mereschet.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Istadiu de Casteddu, cursa detzisiva assa parte de su bandu:s’intentu est  lampadas pro alcansare Euro 2032.

Su caminu a banda de s’istadiu novu de su Casteddu Fubbalu bintrat in d’una fase importante. S’intentu chi tenent su Club e s’amministratzione comunale est cussu de arribbare a sa pubbricassione de sa porfia pubbrica internatzionale intro de su mese de lampadas, coladorzu importante pro permittire a sa tzittade de Casteddu de addurare intre sas candidadas pro accasazzare carchi partida de UEFA Euro 2032.

Su puntu supra de s’isviluppu de su disignu est bistadu fattu in Roma, in sa sede de sa FIGC, in su mentres de un’addobiu cun s’UEFA, su Comune e sa sotziedade ruju e blau. A su tzentru de su cunfrontu mescamente su rispettu de sos tempos e su livellu de creschida de su disignu tennicu, amministrativu e accolomicu finantziariu de s’impiantu,destinadu a remplasare s’istoticu Istadiu S.Elia, chi che at essere imboladu pro faghere logu a su novu modernu e chi at a serbire pro medas cosas.

Sos tempos sunt serrados. Sa pubbricassione de su bandu intre s’incumintzu de s’istiu est una cosa essentziale pro itte s’UEFA potat ponnere Casteddu in sa lista de sas tzittades candidadas giai intre triulas 2026. Pro custu motivu, intre sas chidas chi ant a bennere si at a cuntzentrare su tribagliu supra sos urtimos coladorzos amministrativos chi sunt de deffinire.

Addurant difattis de ispinnicare paritzos crobos ligados a su dirittu de supraffitzie e a su canone, chi sunt tzentrales po deffinire su Pianu accolomicu e finantziariu chi est preparande s’amministrassione comunale. Solu pustis chi ant essere deffinidos custos puntos at essere possibile trasmittire su Pef a su Ministeru de s’Accolomia e de sas Finantzias, po retzire sa decrarassione de Interessu Pubbricu in Cunsizzu comunale e faghere su bandu internatzionale.

Dae s’incontru romanu est bessidu a pizzu unu cuncordu istitutzionale supra s’importantzia istrategica de s’opera e unu apprezziamentu pro su tribagliu fattu fintzas a como. Su disignu, secundu cantu si connoschet, diat aere apperricadu unu livellu de isviluppu chi benit cussideradu coerente cun cantu benit dimandadu pro un’accadessimentu internatzionale comente s’Europeu 2032.

Parallelamente, si registrat unu mezzoru in sa propriedade de su club. Unu coladorzu chi diat podere garantire meda prus fortesa finantziaria e agguantare s’imbestimentu ligadu a s’impiantu novu, elementu crae in su pianu de creschida de su club.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22