Primas mesuras de accottu approadas pustis de su mumujone Harry:istantziados 10 milione de euros.

Sa Regione at approadu sos indiritzios attuativos po sas primas mesuras de accottu lestru a sos tzittadinos e dittas corpados dae sa colada de su mumujone Harry, cun d’una summa po incumintzare de 10 miliones de euros. Su provvidimentu istabilit siat s’ispartidura de sos contribbudos lestros siat su contu de sos dannos, chi at a serbire po atteros interventos de accottu.

Sas attividades de sa laurantza, de pesadura e de sa pisca ant essere azzuadas pius a daenanti. Su documentu approadu, ponet impare sas proceduras tennicas amministrativas in tottu s’iscrocca de sa regione, garantinde tempos lestros de ispartidura e coerentzia de s’assione amministrativa. Sos Comunes chi sunt bistados seperados dae su pregone de su capu de sa Divisione de sa Protessione Tzivile podent avviare sos protzedimentos po cuntzedere sos contribbudos, sighinde sos indiritzios approados e amministrare sa regorta e s’istruttoria de sas dimandas po mesu de su Sistema Informativu de Protessione Tzivile.

Benefissarios de sos contribbudos sunt sos privados o merese de benes avariados, incluidinde domos, benes mobiles e benes mobiles registrados, e fintzas attividades accolomicas e de produssione chi ant tentu dannos a sas cosas chi ammos appena mentovadu azzunghindebi mertzes, cosas chi non sunt ancora finidas o giai finidas. Non bi sunt in s’accottu sos dannos ligados a su mancadu balanzu. A su mamentu, sas attividades de laurantza e de sa pisca non podent presentare sa dimanda, pro itte si isettant sas mesuras dedicadas chi permittant de garantire su massimu de s’azzudu possibile, semper intro de sos marghines de sos azzudos de Istadu.

Sa prima parte de 10 miliones de euros po su bilanciu regionale 2025-2027 at a podere essere unida cun attera dinari si at a serbire. Custu interventu, mancari siat solu su primu passu, est unu sinzale beru de sa volontade de accottare a sa lestra chie at tentu dannos graes, evidentziande s’importantzia de un’assione lestra e cordinada po minimare sos dannos de sos bisestros naturales e tutelare sa resilientzia de sas comunidades e accolomias locales. Unu nuntzu bonu po chie at veramente bividu cun isprammu sos dannos de su tempus malu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22

Appostamentu mortale in Orane:operaju de 38 annos mortu sutta de domo, s‘iscruccullat po su motivu.

Un’appostamentu in su coro de sa notte ad abbolottadu erisero sa comunidade de Orane, in su Nugoresu. Tonino Pireddu, operaju de 38 annos, est bistadu mortu a corpos de arma in su mentres chi fuit torrande in domo sua in su Cursu Italia. Unu crimene fattu a s’iscuru, daenantis a domo sua, chi faghet torrare a pigare sa tesone in sa bidda e abberit dimandas chi sunt tottu de accrarare.

Secundu sas primas ideas, s’omine, chi tribagliaiat po una ditta de s’arga, fuit appena torradu a domo, imparis a sa cumpanza sua. Pustis de aere frimmadu sa macchina, si diat essere frimmadu carchi mamentu intro de sa macchina mattessi po leare carchi cosa. Est bistadu in cussu mamentu chi calicunu, approfittande de s’iscuru e cun meda probabbilidade cuadu accanta a sa domo, at isparadu unu o pius corpos, bocchindelu.

Un’assione lestra e istudiada bene. Su killer, o sos killers, si sunt fuidos a sa lestra, faghinde perdere sas andalas insoro. Po su momentu non bi sunt testimonzos de s’appostamentu e niunu paret chi eppat bidu movimentos suspettos. Sos aberguadores sunt faghinde controllos in tottu su logu po chircare si bi sunt friguras de sa videosorvegliantzia o elementos chi potant serbire po cumprendere comente siant andadas sas cosas.

Sa cramida est bistada fatta appena si sunt intesos sos isparos. Sunt arribados sos carabbineris de sa cumpanzia de Nugoro e sos de su 118, chi ant tentadu in donzi manera de sarbare s’omine, ma po issu no bi est bistadu nudda de itte faghere: cando sunt arrivados fuit giai mortu. Sa nova si est isparta a sa lestra in Orane, dassande tottus isporos e incredulos. Pireddu fuit connoschidu meda comente tribagliadore e faghiat una vida allogada. Sa morte rebbesta sua a corpidu meda sos de famiglia, amigos e tzittadinos, chi como isettant rispostas.

Sa muda est ancora prus inchiettante po una cosa accadessida duos meses faghet. In su mese de Nadale, difattis, s’operaju aiat giai tentu un’atteru attentadu: li aiant brusiadu sa macchina. Un’attu chi oe tenet unu signifficu divressu meda. Sos aberguadores sunt controllande si bi siat unu collegamentu derettu intre cussu fattu e su mortoriu de eris notte. Fintzas a custu mamentu non si podet escluidire nudda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22