Su Casteddu serrat su 2025 cun d’unu bilanciu positivu e sa classifica prus sulena. Sos ruju e bleu sunt a su logu 14, cun ses puntos in prus supra s’isquadra chi est a su logu degheotto, unu chizu chi permittit a s’isquadra de accomettare sa secunda parte de s’istajone cun prus calma.

Pustis de un’incumintzu piga e cala, s’isquadra de Pisacane at acciappidu un’ecchilibriu prus mannu, mescamente in defensa,affortigande sos risurtados e mustrande continuidade in sas prestas. In sas urtimas zorronadas s’isquadra est appassida prus cumpatta e capatze de accaudalare sas occasiones creadas, cunfirmande de podere gherrare bene in donzi campu.

S’ispantu beru de fine annu est Semih Kilicsoy. S’attaccante turcu at bividu un’iscoppiu beru e propriu in sas urtimas chidas, battinde goals, velocidade e creatividade. Sas prestas suas ant cambiadu sa cara de s’attaccu ruju e bleu e influentzadu sa programmatzione de sa dirigentzia in bista de su mercadu de bennarzu. No est fuidu a nisciunu.

Cun Kilicsoy puntu frimmu de s’attaccu, su Casteddu paret orientadu a si interessare a atteras partes, evitande de cambiare s’ecchilibriu de s’isquadra de domo. S’intentu est de affortigare sa rosa e garantire una salvesa acchietta, chentza revolussiones chi diant podere cumpromittere sos mezoros aggradiados.

Su 14° logu a fine annu no est solu unu calculu: est unu signale de creschida e firmesa. Su Casteddu bintrat in su 2026 cun bases fortes, una classifica chi preoccupat prus pagu e una certesa offensiva supra sa cale fraigare su tempus benidore lestru. Sos tiffosos ruju e bleu podent abbaidare a daenantis cun medrada sicuresa, isperande de bivere unu 2026 prus serenu e cumpetitivu. Ma pustis de s’urtima partida cun su Torino s’isperantzia non mancat a s’Unipol Domus.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22