Unu fogu mannu at devastadu su pinedu prus mannu de sa zura de Marrubiu, in su coro de sa provintzia de Aristanis, cajonande sa perdida de una figura importante po s’ambiente, sa cultura e sa memoria de sa comunidade locale.

Secundu sas primas novas su fogu at attraessadu una supraffitzie de prantamine in d’una zura intre Marrubiu e Arborea, inube bi sunt imbuschimentos mannos de oppinos e eucalittos chi dae pius de 50 annos deffinint sa bista e sunt unu prummone birde po tottu su Campidanu aristanesu.

Sas framas, alimentadas dae su bentu forte de su sero e dae sas cunditziones de siccagna tipicas de s’istajone, si sunt movidas lestras meda e ant dimandadu s’interventu importante de isquadras, vigiles de su fogu,de sa Forestale e aereos Canadair e elicotteros, po resessire a alindare su fronte de sas framas, ma su bilanciu, mancari siant chircande de faghere su contu, faeddat de deghinas de ettaros de pinedu brusiados.

Sa destrussione de custu pinedu corpat in manera funguda siat dae su puntu de bista ambientale siat dae cussu culturale e sotziale: po sos chi bistant incue, cussos buscos funt una memoria biva de su conntottu de sa laurantza e rurale de sa zura, logos dae sos cales partiant sas istorias de familias chi in sos annos aiant camminadu intre cussas andalas po regollere linna o solu po chircare umbra e illepiu. Po medas betzos fuit unu logu prenu de ammentos, po sos zovanos unu logu po istare in fora, po sos assozios locales unu teatru naturale de momentos tott’impare e de cura de su birde.

Sa perdida de custu pinedu est unu corpu tostu po Marrubiu e sa comunidade sua, chi como si at a teppere cunfrontare non solu cun su recuberu de s’ambiente naturale, ma fintzas cun su signifficu de una ferida abberta in su coro de un’iscrocca chi po medas annos est bistada un’esempru de connottu, identidade e arroddu cumone.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Einstein Telescope, sa Sardigna puntat supra Sos Enattos: un’istrumentu pro istudiare s’univressu.

S’Einstein Telescope est un’istrumento iscientificu addaenantis medas chi at a permittere a sos istudiosos de iscrudignare sas undas gravitatzionales chi arribant dae s’univressu primarzu e de istudiare sos fenomenos de su trettu chi oe non podimos ancora biere.

Si trattat de unu osservadoriu de ingendra nova chi nos at a podere azzuare a cumprendere menzus comente est naschidu e creschidu s’Univressu. Gratzias a sa dilighesa manna sua at essere possibbile iscrudignare abbenimentos cosmicos istravandos comente sa tumbada intre toffos nieddos o intre istellas de neutrones abbeniddos miliardos de annos faghet.

Sa Sardigna at a presentare ambas sas possibbiles formas de s’osservadoriu: cussa a triangulu e cussa cun duas istrutturas a forma de L. Carchi istudiu at mustradu chi sa soluzione cun duas L diat podere dare risurtados iscientifficos menzus e minimare carchi arriscu tennicu. S’idea est cussa de faghere custa solutzione imparis a sa Sassonia, creande una collaborassione intre Istados Europeos divressos supra unu de sos disignos iscientificos prus importantes de sos annos imbenientes.

Pro sos iscientziados su situ de Sos Enattos, in s’iscrocca de Luvula, est unu de sos logos menzus in su mundu pro fraigare custu osservadoriu. Est difattis una zura meda muttiga dae su puntu de bista sos terremotos e casi briva de cale si siat burdellu motivadu dae sas attividades de s’omine. In prus sa rocca presente sutta de terra est adatta meda a sos iscavos netzessarios pro fraigare sas istrutturas chi ant a accasazzare sos istrumentos iscientifficos.

Su fraigu suo diat podere mustrare un’occasione manna po s’iscrocca. Unu disignu comente custu podet battire imbestimentos novos e occasiones meda de formazione. Sa presentzia de s’osservadoriu diat podere favoressere sa creschida de sa chirca iscientifica e apparare possibilidades novas pro istudiantes,chircadores e tennicos chi tribagliant in sas zuras de s’iscientzia e de s’inzennieria.

Unu fraigu iscientificu gai importante diat podere battire beneffissios fintzas a s’accolomia locale. A inghiriu de su disignu diant podere naschere attividades novas ligadas a sa chirca, modernissassione e servitzios chi serbint pro accotzare unu tzentru iscientificu internatzionale mannu meda. In prus diat podere affortigare sa collaborassione intre universidades, tzentros de chirca e istitutziones europeas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22