Su Ris torrat a sa propiedade de Ragnedda: si chircant tràcias e ogetos isparidos

A pustis de su ricòveru de Emanuele Ragnedda in s’ispidale Santissima Annunziata de Tàtari, a pustis chi paret chi epat tentadu de si ochìere, sos ispetzialistas de su Ris de sos Carabineris de Casteddu sunt torrados a sa propiedade de Conca Entosa. Est in cue chi ant mortu a Cinzia Pinna, sa pitzoca de 33 annos de Casteddu-sardu morta in sa domo de campagna de s’imprendidore de su binu de 41 annos.

Sos militares sunt imbàtidos cun unu fuoristrada, agiuados dae duos mezos de s’agentzia regionale Forestas chi portaiant tosaerba e atretzos agrìculos. Sas atividades de rilievu, fatas a sa presèntzia de sos avocados de sas partes, sighint cun sa punna de recuperare carchi tràcia chi podet serbire e, mescamente, sas cosas personales de sa morta, isparidas paris cun su telefoneddu suo luego a pustis chi aiant agatadu su corpus suta un’àrbore de sa propiedade.

Est prevididu fintzas unu sopralluogu in su yacht de famìllia, ancoradu in Cannigione. Est sa matessi imbarcatzione dae sa cale Ragnedda aiat impreadu su tender pro imbàtere a Baja Sardìnia, a faca a Porto Cervo, in ue b’est sa domo de famìllia. Cussu tentativu de si nche fuire est sutzessu in su mentres chi sos carabineris lu fiant giai chirchende, andende a sa propiedade sua.

Segundu su chi est bessende a pìgiu dae sas indàgines, s’imprendidore aiat giai pensadu de si liberare de su corpus de Cinzia ghetende·nche·lu in mare, forsis dae sa roca de Capo Ferro. Però non sunt ancora craras sas cosas chi sunt sutzessas a pustis de sa morte e mescamente si s’òmine teniat calicunu chi l’epat agiudadu. Pro como duas persones sunt iscritas in su registru de sos indagados pro favoressimentu.

Segundu sos investigadores, ambas duas ant agiudadu a innetare sa domo dae sas tràcias de sàmbene e a nche fàghere isparire sa roba e àteros ogetos personales de sa morta. Podet èssere chi s’elenco de sos indagados si potzat sighire a illonghiare.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”

Ghirada a sa terra insoro: sa Cuestura de Aristanis intervènit supra de droga e dimandantes asilu perigulosos

Tres tzitadinos colombianos sunt bistados imbiados a sa terra insoro dae s’Itàlia e dae sa politzia de Aristanis, cunsiderados partes de una organizatzione criminale ispetzializada in sa contipizazione, e ispartidura de droga. S’operatzione sinzat unu interventu novu de sa Cuestura supra sa siguresa e su cuntrastu a sa criminalidade ordiminzada.

S’iscrucculla, fatta dae sos carabineris e acabbada cun sos arrestos, fiat incomintzada su mese de austu coladu. Otto persones fiant finidas in manettas, totus ligadas a una azienda agrìcula posta in “Ceas ’e Perdixis”, in su sartu de Biddorbanà. Su logu, a su cumintzu una azienda agrìcula normale, fiat bistada cambiada in unu tzentru beru de produtzione de sa cannabis, cun sistemas de abba e de cuntzimu, locales pro sa siccadura e logos dedicados a su manizu e a s’ammuntadura de sos frores.

S’organizatzione resurtaiat perfetamente ordiminzada: donzi imputadu teniat unu rolu ispetzìficu, dae sa direzione de sa contipitzazione a sa sorveglianza de su manizu, fintzas a s’ispartidura in su mercadu. Sos tres tzitadinos colombianos imbiados a sa terra issoro fiant in presone in domo fintzas a sa detzisione finale. Accumpantzados dae sos de sa Cuestura de Aristanis, sunt bistados leados as’aeroportu de Fiumicino, inube sunt bistados imbarcados supra unu bolu pro su Sud-Amèrica, a s’acabu de unu caminu giuditziàriu chi at recheridu meses de iscruccullas e accordiu intre sas fortzas de s’òrdine.

Ma s’atividade de sa Cuestura non si frimmat solu a sos casu de criminalidade ordiminzada. Dae pagu, s’Ufìtziu de Immigratzione at provèdidu puru a su tràmudu a su Tzentru de Permanèntzia (Cpr)de Macumere de battoro dimandantes asilu, de natzionalidade tunisina e egitziana. Sos istranzos, de su tzentru de acollida de Cràbas, fiant bistados imbiscados in delitos diferentes fatos intre Cràbas e Aristanis.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”