Sa Tzitadella de sos Museos de Casteddu: unu viazu de istària, arte e identidade.

In sa parte de artu, in s’ungrone de “Castello”, in sa tzitade de Casteddu, b’at una piatza manna, chi li narnat piatza de s’Arsenale. Lassada a un’ala “Porta Cristina”, unu podet bìere luego sa Tzitadella de sos Museos de Casteddu, chi est unu logu de importu po sa cultura sarda. Incue b’at archeologia, b’at arte, b’at architetura e b’at paesazu: est unu logu inube s’ammentu de sos tempos colados si aunit a su tempus presente e si oferit a sos turistas, sardos o istranzos chi siant.

Cussu logu est antigu meda: a sos tempos de sos Pùnicos e de sos Romanos incue b’aiat domos e butegas, e custu si podet cumprèndere ca mescamente suta terra b’ant agatadu arrastos de s’antighidade. A pustis, in cussos tretos b’at istadu defensas pisanas e ispagnolas. Custu logu est divènnidu unu museo solu in su Noighentos, addaghi sos architetos Cecchini e Gazzola ant prozetadu de amparare s’Arsenale de su Re e sos muros de defensa medievales, fraigande unu logu modernu e capatze a s’adatare a s’ungrone de sa tzitade, ube b’at palatos e domos de bellesa rara.

Sa Tzitadella oe est su logu inube b’est su Museo Archelògicu Natzionale, chi costoit mizas e mizas de repertos agatados in totu sa Sardigna, dae sa Pre-istòria e su Tempus de Mesu. B’at de totu incue: b’at, infatis, repertos de su tempus de sos nuraghes, de su tempus de sos Pùnicos, de sos Romanos e de sos Bizantinos. A costas de custu museo, b’est sa Pinacoteca Natzionale, inube b’at cuadros de cada zenia, chi lassant ammachiados cussos chi andant a los abbaidare. B’at retablos gòticos- cadelanos, ma puru pinturas de sas dies de oe.

In cussos tretos b’est puru su Museo de Arte Siamese, chi costoit colletziones orientales de bellesa rara: b’at armas e trastes de richesa manna. Incue b’est fintzas sa regorta de sas Cheras Anatòmicas de Clemente Susini, inube si aunint arte e iscièntzia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22