Silvio Lai segretàriu nou e Juanna Iscanu presidente noa de su PD in Sardigna.

Silvio Lai est su segretàriu nou de su Partidu Democràticu in Sardigna. L’ant elèzidu in s’ìnteri de s’assemblea regionale de su patridu, fata in su Tzentru de sos Congressos de Tramatza, in provìntzia de Aristanis. A su tempus matessi, Juanna Iscanu est istada votada comente presidente de su PD sardu, issa puru, comente a Lai, cun su favore de totus.

Juanna est sighinde a ammaniare una leadership chi at sa punna de mantènnere s’unidade interna e sa continuidade de sa lìnia polìtica de su partidu.

Lai, deputadu e zai segretàriu regionale de su PD in su 2009, est torrande a ghiare su partidu a pustis de pius de degh’annos. Issu at esperièntzia manna in sa polìtica e custu bi lu riconnoschent in medas. Su nòmene sou e s’eletzione sua sunt po medas sinnale mannu de istabilidade si si pensat a sas votatziones chi b’amos a tènnere dae oe a pagu tempus.

Lai, chi fuit sètzidu in sas cadreas de dainanti su die de s’assemblea de Tramatza, est istadu aggradèssidu meda dae totus, chi sunt istados cuntentos mannos po l’àere elèzidu. Custu cheret nàrrere chi totus ant unu pàrrere bonu des’òmine e de su polìticu chi ant votadu. Chi l’aiant elèzidu est istadu nadu uffitzialmente dae su segretàriu betzu e presidente de su cossizu regionale, Piero Comandini, addaghi at saludadu sos presentes. In cussas paràulas de saludu, bi fuint puru sas novas de s’eletzione de Juanna Iscanu, chi fuit istada zai vice-presidente de su partidu e chi est istada elèzida presidente, cun sa punna de afortire sa coesione interna e sa visibilidade de su partidu. Fintzas s’eletzione de Juanna Iscanu est istada aggradèssida meda dae totu sos presentes de cudda die.

Sunt istados votados Lai e Iscanu a pustis de una bella chistionada intre sos dirigentes regionales, chi ant fatu sos nòmenes insoro cun sa siguresa de nche pònnere duas persones sàbias e cumpetentes meda. Sa die chi ant detzisu custa cosa, mancari esserant apenas in ritardu, fuint totus
cuncordos po nche pònnere a issos duos.

Cun s’eletzione de Lai e de Iscanu, su Pd sardu at sa punna de afortire su rolu sou intro de su panorama polìticu regionale.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Andria Parodi, sìmbulu de sa Sardigna e boghe chi nos mancat ancora oe.

Andria Parodi abbarrat unu de sos cantadore e musicistas pius bene crèfidos de sa Sardigna, sìmbulu de un’ìsula chi cantat s’identidade e sa cultura sua a mèdiu de sa mùsica. Andria est nàschidu in Casteddu in su 1967 e at ischidu betare a pare connotu e modernidade, faghinde appretziare su patrimòniu musicale sardu a unu pùblicu natzionale e internatzionale gràssias a sa boghe sua, potente e ùnica.

Sa carriera de Parodi est comintzada cun sos Tazenda, unu sòtziu chi at mudadu meda su panorama musicale sardu cun unu sound chi est ùnicu e capatze de ammesturare folk, rock e sonoridades sardas. Sa boghe sua est divènnida luego comente una marca de fàbrica de unu sòtziu chi at ischidu contare sa Sardigna a manera autèntica e contemporànea. In s’andare de sos annos, Parodi at poi cantadu a sa sola, sena sos Tazenda, ma a bortas cantande puru cun cantadores italianos e istranzos, semper però cun unu ligàmene mannu cun sa terra sua.

Parodi no est istadu unu musicista ebbia, ma est istadu puru unu tistimonzu de sa cultura sarda. sas cantones suas nos contant istòrias de sa vida de cada die, memòria de su connotu de totus chi at raighinas profundas, diveninde puru comente a unu ponte dae su tempus coladu a su presente. Si nch’est mortu chi non fuit betzu ancora, in su 2006, e nos at lassadu un’arrastu mannu in sa mùsica sarda, ma finztas in sa mùsica italiana. Sa boghe sua, ancora oe, sighit a cantare in sos ammentos de totus chi li torrant gràssias mannas po cussu chi at fatu po s’ìsula nostra.

Oe, Andria Parodi est unu esèmpiu mannu po sos cantadores e musicistas noitolos puru, est unu mastru mannu, unu sìmbulu de totu canta sa Sardigna. Festival, cuntzertos de tributu e regortas chi ant fatu a pustis de sa morte sua nos faghent a cumprèndere cantu mannu siat s’ereu artìsticu e culturale sou, chi est meda pius mannu de sas nodas musicales suas. Totu custu est sinnale mannu de cantu issu siat istadu ambassadore de sa Sardigna in totu su mundu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22