Sas bestimentas de Dèsulu: colores, ricamos e istòria.

Est difìtzile chi unu non s’abbizet, ca at colores abbistos meda, de su costùmene de Dèsulu si atopat una desulesa a ziru. Est unu bistire chi cosint e ricamant sas sartas de custa bidda, chi sunt de manos bonas meda. Est unu de sos costùmenes pius connotos de totu sa Sardigna. Custu costùmene no est solu unu bistire, ma est pròpriu unu sinnale craru de identidade e de cultura, chi nos contat s’istòria de sos tres ungrones de Dèsulu a mèdiu de filos de seda, de robas tèssidas in domo e de ricamos fines.

Su costùmene de sas fèminas las acumpanzat po tutu sa vida insoro. B’at calidades meda de custos costùmenes in Dèsulu. Dae pitzinnas a betzas, sas desulesas ant costùmenes diferentes po donzi ocasione. Sos colores chi pius ispicant sunt su grogu, su ruju, su colore de arantzu e su colore de chelu, chi parent torrande a cabu a su sinnale de s’identidade de sas bator Barbàgias. Donzi colore, donzi puntu de ricamu o de cosinzu e donzi sestu ant unu significadu pretzisu, chi s’agatat dae tempos remotos e chi sas fèminas ereditant dae mamma in fiza.

Su costùmene est fatu de partes meda chi, betadas a pare, lu faghent armoniosu e elegante. Sa careta est de pannu ruju e jughet ricamos fines. In Dèsulu li narant su cucuddu e chinghet sa cara de sas fèminas, chi sa ligant cun unu frocu ruju suta sas barras. Su mucadore, chi si ponet a subra de sa careta, dat delicadesa a sa cara de sas fèminas. Sa camisa, chi est bianca, est sa prima parte chi sas fèminas si ponent.

Jughet ricamos fatos in manos chi in biddas meda mutint “incoradura”. A subra de sa camisa bi cherent sas paletas e posca su cipone, chi ant ricamadas a filos de seda e chi si podent jùghere puru a s’ala mala. Sa bunnedda est de furesi ruju e li narant su saùciu. Jughet fetas in colore de chelu e ricamos elegantes.

Totu sas partes de su costùmene de Dèsulu si podent jùghere e un’ala e a s’àtera. Una parte est po fitianu, s’àtera est po càstigu e po sas dies nòdidas. Addaghi una infiudat, su costùmene si lu depet tìnghere a nieddu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Su fenomenu de sos mangones in s’istagnu de Molentargius: un’ispettaculu naturale in su coro de sa tzittade.

S’istagnu de Molentargius, intre Casteddu e Quartu S. Elena, offerret unu de sos ispettaculos prus ammaghiantes de sa Sardigna cun sa presentzia regulare de sos mangones arrubios. Custos puzzones galanos, chi faghent parte de sa zenia Phoenicopterus roseus, sunt attirados dae sas abbas calmas e salamattas de sa zura, chi offerrint cundissiones ideales po los faghere pappare e faghere sos nios. Su Parcu Naturale Regionale de Molentargius-Saline, chi est mannu casi 1.600 ettaros e cumprendet istagnos, abba e salinas istoricas, est bistadu fattu po tutelare custu eco-sistema unigu, reconnoschidu a livellu internatzionale dae su Protocollo de Ramsar.

Sos mangones arribant donz’annu dae zuras divressas de su Mediterraneu, comente Francia,Spagna e nord Africa, e acciappant in Molentargius unu furriadorzu seguru gratzias a sas abbas bassas, riccas de cosa de pappare e paza marina, e a sa trancuillidade de s’ambiente. Dae su 1993, sa zura est divennida fintzas unu logu po faghere sos nios: donzi beranu sas cropas, fraigant nios de fangu, ponent sos ovos e creschent sos puzzoneddos, dande vida a unu fenomenu de biodiversidade ispettaculare.

Su tempus massimu de appellida andat dae martu a triulas, cando sos puzzoneddos naschent cun pinnammene ferulattu e sos mannos si movent tottu imparis, pappande e comunicande intre issos, creande una bera “nue arrubia” chi si biet dae attesu meda. Pro diffendere sas niadas, su Parcu controllat su livellu de s’abba e alindat s’intrada a carchi zura, garantinde gai sa trancuillidade chi serbit a sos puzzones. Fintzas fora de s’istajone sessuale, sos mangones  addurant a s’ispissu in s’istagnu o in sas zuras umidas accanta, comente s’istagnu de Santa Gilla, offerrinde un’ispettaculu unigu con sos bolos elegantes insoro e accumpanzados dae atteras zenias de puzzones de s’abba, intre sos cales mengones,tzurullios, filippas e anadras.

Sa presentzia de sos mangones in Molentargius, ets unu esempru craru de bivere imparis intre natura e tzittade, mustrande comente un’eco-sistema delicadu potat esistire a pagos passos dae su tzentru de sa tzittade. Custu fenomenu naturale no est solu un’occasione po su birdwatching, ma fintzas un’indittu de sa puresa de sas abbas e de sa calidade de s’habitat, cuffirmande s’importantzia de tutelare e balorizzare sas zuras umidas sardas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22