S’anzone de Sardigna IGP conchistat s’Australia e andat a Sydney.

S’anzone de Sardigna IGP faghet unu passu importante a banda de sos mercados internatzionales, isbarcande in Australia, su primu paese a su mundu chi produet petta de erbeghe. Sa partecipassione a Fine Food Australia est no solu un’opportunidade de negossiu istravanada, ma puru
unu momentu de cunfrontu cun sas menzus eccellentzias de su campu in su mundu. Sa fiera, chi b’est in Sydney dae s’8 a s’11 de capudanne, est sa pius importante B2B dedicada a food & beverage de sa zura Australasia e muttit donz’annu buyer, importadores e operadores de su campu dae tottu su continente e no solu.

Po su Consorziu Contas, chi in sos annos at giai affortigadu sa presentzia in fieras de importu mannu in Asia e in atteras zuras importantes meda po s’export de sa cosa de pappare, s’arrivu in Australia est una novidade e un’occasione po affortigare su marcu sardu in d’unu mercadu meda cumpetitivu e de connottu mannu in sa produssione e cossumu de sa petta de erbeghe. Sa partecipassione a custa fiera at a permittere a su Consorziu de presentare derettu a sos buyer internatzionales sas calidades unicas de s’Anzone de Sardigna IGP, reconnoschidu po sa calidade de sa petta, sa sustenibilidade de sas pratigas de pesadura e su ligamene cun s’iscrocca de s’isula.

Sa prima bessida in Australia de su marcu est bistada possibile gratzias a s’accottu de s’Italian Trade Agency(ITA), s’agentzia de su guvernu italianu chi operat sutta sa vigilantzia de su Ministeru de sos Affares Esteros e de sa Cooperassione Internatzionale. S’ITA tenet su compidu de favoressere s’internatzionalissasione de sas ditta italianas , agguantare s’isviluppu de su negossiu cun s’estero e balorizzare s’eccellentzia alimentare italiana in su mundu.

S’isseperu de sas dittas chi ant partecipadu a Fine Food Australia est bistada fatta in manera  cumpetitiva meda.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Einstein Telescope, sa Sardigna puntat supra Sos Enattos: un’istrumentu pro istudiare s’univressu.

S’Einstein Telescope est un’istrumento iscientificu addaenantis medas chi at a permittere a sos istudiosos de iscrudignare sas undas gravitatzionales chi arribant dae s’univressu primarzu e de istudiare sos fenomenos de su trettu chi oe non podimos ancora biere.

Si trattat de unu osservadoriu de ingendra nova chi nos at a podere azzuare a cumprendere menzus comente est naschidu e creschidu s’Univressu. Gratzias a sa dilighesa manna sua at essere possibbile iscrudignare abbenimentos cosmicos istravandos comente sa tumbada intre toffos nieddos o intre istellas de neutrones abbeniddos miliardos de annos faghet.

Sa Sardigna at a presentare ambas sas possibbiles formas de s’osservadoriu: cussa a triangulu e cussa cun duas istrutturas a forma de L. Carchi istudiu at mustradu chi sa soluzione cun duas L diat podere dare risurtados iscientifficos menzus e minimare carchi arriscu tennicu. S’idea est cussa de faghere custa solutzione imparis a sa Sassonia, creande una collaborassione intre Istados Europeos divressos supra unu de sos disignos iscientificos prus importantes de sos annos imbenientes.

Pro sos iscientziados su situ de Sos Enattos, in s’iscrocca de Luvula, est unu de sos logos menzus in su mundu pro fraigare custu osservadoriu. Est difattis una zura meda muttiga dae su puntu de bista sos terremotos e casi briva de cale si siat burdellu motivadu dae sas attividades de s’omine. In prus sa rocca presente sutta de terra est adatta meda a sos iscavos netzessarios pro fraigare sas istrutturas chi ant a accasazzare sos istrumentos iscientifficos.

Su fraigu suo diat podere mustrare un’occasione manna po s’iscrocca. Unu disignu comente custu podet battire imbestimentos novos e occasiones meda de formazione. Sa presentzia de s’osservadoriu diat podere favoressere sa creschida de sa chirca iscientifica e apparare possibilidades novas pro istudiantes,chircadores e tennicos chi tribagliant in sas zuras de s’iscientzia e de s’inzennieria.

Unu fraigu iscientificu gai importante diat podere battire beneffissios fintzas a s’accolomia locale. A inghiriu de su disignu diant podere naschere attividades novas ligadas a sa chirca, modernissassione e servitzios chi serbint pro accotzare unu tzentru iscientificu internatzionale mannu meda. In prus diat podere affortigare sa collaborassione intre universidades, tzentros de chirca e istitutziones europeas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22