Sa Regione Sardigna si bortat a su TAR contra su disignu de approntu de batterias a su litiu in Mogorella.

Sa Regione Sardigna at dezisu de si bortare a su TAR contra s’autorissasione chi at dadu su Ministeru de s’Ambiente e de sa Sicuresa Energetica po su crompimentu de unu approntu de accumulu elettrochimicu (BESS) cun batterias a su litiu de 72 MW in su comune de Mogorella, unu tzentru pitticcu de sa Marmilla, in provintzia de Aristanis.

Sa detzisione de sa Regione arribat pustis chi, giai in sa Cunferentzia de servitzios, fuit bistadu dadu parrere negativu supra cust’opera. In cussa occasione, s’Assessoradu chi tenet sa cumpetentzia aiat mentovadu sas lezes regionales chi tutelant sa bista e sos terrinos de sa laurantza, evidentziande s’importantzia de diffendere logos de balore istoricu, culturale e ambientale, e ammentande chi donzi interventu de isviluppu depet rispettare sas lezes regionales.

Sa posizione de sa Regionae non naschet dae unu reffudu de sa transizione energetica, ma da una dimanda crara: calesisiat disignu de produssione o accumulu de energia devet essere crompidu in su rispettu de sas regulas, de sas cumpetentzias locales e de sa bardiada de s’ambiente. Sa tutela de sas bistas, de sos terrinos de sa laurantza e de sas comunidades locales benit cunsiderada unu fundamentu importante, gai commente su dirittu de sos tzittadinos a s’intzidida a sos seperos chi pertoccant a s’isviluppu de s’iscrocca insoro.

Sa bortada a su TAR est duncas un’istrumentu po garantire chi sos prodottos energeticos, mancari netzessarios po sa transizione, no compromittant su balore ambientale e de sa bista de sa Sardigna e no innorent sas lezes regionales. Sa Regione cheret gai tutelare su dirittu de sas comunidades de detzidere comente cunciliare s’isviluppu e su sustentamentu, affirmande chi sa creschida accolomica e su rispettu de s’iscrocca depent andare unu paris cun s’atteru.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Iscoperta una necropoli in su Nord Sardignain su mentres de sos tribaglios po un’approntu solare.

Un’iscoperta archeologica importante meda est bistada fatta in su Nord Sardigna in su mentres de tribaglios ligados a sa produssione de energia pulida. In sa zura industriale de truncu Reale-Sant’Agostino, accanta a Tattari,sos iscavos de ammaniada pro fraigare un’approntu solare ant fattu bessire a pizu una necropoli chi fintzas a oe non fuit bistada mai iscoperta.

S’accattu est sutzessu in sa zura curada dae su Consorziu Industriale de Tattari. Sos iscavos sunt incumintzados in su mese de martu de su 2024, cando sunt bistados cunviados sos controllos de su terrinu prima de fraigare s’impiantu. In su mentres de custos controllos sos archeologos ant acciappidu istrutturas sutta de terra e, sighinde cun sos iscavos, ant cumpresu chi si trattaiat de unu logu antigu de tumba.

Secundu su chi pensant sos espertos, su logu est importante meda po s’istoria e s’iscentzia. In sa zura sunt bistadas agattadas tres tumbas mannas iscavadas in sa rocca, istrutturas mannas chi faghent pensare a tumbas de balore mannu po sas populatziones chi biviant in custa zura in s’antichidade. S’iscoperta est fintzas prus interessante pro sa presentzia de decorassiones fittadas supra sas barras’e muru de sas tumbas. Si trattat de signos e pintas fittados in sa rocca in sos seculos passados. Custa fittadas faghiant parte de su connottu de sos interros de sas populatziones antigas de sa Sardigna e a s’ispissu teniant unu signifficu simbolicu o religiosu.

Po sos istudiosos custos elementos sunt importantes meda pro itte podent azzuare a cumprendere menzus comente biviant sas comunidades de su tempus passadu e cale esserant sas credentzias insoro. Sas tumbas e sas decorassiones diant podere dare novas supra su connottu, sa cultura e sa vida de sas pessonas chi biviant in s’iscrocca tattaresa mizza e mizza de annos faghet.

Sos archeologos ant a sighire a istudiare sa zura e analizzare tottu su chi est bistadu acciappidu in su mentres de sos iscavos. Donzi particulare novu diat podere accreschere sas informatziones chi serbint pro fraigare s’istoria de su logu. Custa iscoperta mustrat un’attera borta cantu sa Sardigna siat ricca de testimonzas de su passadu. Fintzas in su mentres de tribaglios modernos, comente cussos ligados a sa produssione de energia, podet capitare de acciappare andalas de tziviltades antigas meda chi contant s’istoria longa de s’isula.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22