Giallu de Portisco, atzertamentos novos supra sa barca: misteru supra sa morte de Giuanne Marchionni.

Sunt andados a daenanti po pius de battoro oras sos cabbales iscientificos supra sa barca agganciada in sa Marina de Portisco, in Terranoa,intre sa cale, su manzanu de s’8 austu passadu, est bistadu acciappadu su corpus chentza vida de Giuanne Marchionni, 21 annos, naschidu in Bacoli, in provintzia de Napoli.

S’accertamentu chi non si podet ripitere dimandadu dae sa Procura de Tempio Pausania teniat comente intentu su controllu de fuidas de gas o sustantzias tosigas chi potant aere provocadu sa morte de su zovanu. Sos primos controllos,intamen, non ant evidentziadu problemas: nissuna perdida, nissuna paporada est bistada acattada intro de sa barca.

Sos controllos si sunt cuncentrados in manera particulare supra su sistema elettricu e sas batterias. Sunt bistadas controlladas ses batterias de servitziu postat a su tzentru de sa barca, e chi funt tottus perfettas, e pustis cussas de su motore. S’idea de un’attoscadura dae monossido di carbonio addurat diffitzile de agguantare: su gas, pius pesante de s’aera, che finid in sos puntos pius bassos, mentres su logu in su cale drommiat su zovanu est in artu e attesu dae sa zura de su motore.

Cun s’arrivu de s’iscuru, sas operassiones sunt bistadas frimmadas e ant a torrare a incumintzare merculis prossimu. In cussa occasione, sos tennicos ant a faghere atteros controllos cun sos motores de sa barca azzesos, cun s’isperantzia de accrarare si bi funt cosas chi no funtzionaiant o ispartinaduras chi non si sunt bidas in sos primos esamenes. Sa morte de Giuanne Marchionni addurat, duncas,imboligada in su misteru.In custu mamentu non si connoschent ancora motivos tzertos chi potant faghere cumprendere sa morte, e s’attentzione de sa politzia addurat cuncentrada supra donzi elementu tennicu chi potat servire a cumprendere itte potat essere sutzessu cussu tragicu manzanu de istiu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Continuidade de s’iscrocca, billettos a pagu preziu fintzas po sos familiares de sos chi bistant in Sardigna.

Si podent comporare da oe sos billettos in continuidade de s’iscrocca riservados a sos familiares de sos chi bistant in Sardigna. Sa novidade est po su sistema de pesos de servitziu pubbricu chi regulat sos collegamentos aereos da e pro s’isula e accreschit su numeru de pessonas chi podent godire de sos pretzios aggevolados.

Sos billettos si podent comporare po sos bolos dae su 29 de martu, die in sa cale at a bintrare in fortilesa su sitema novu de sa continuidade de s’iscrocca. Cun custu seperu sa Sardigna reconnoschet su dirittu de biazzare a pretziu bassu, non solu a chie bistat in s’isula, ma puru a chie, mancari bivat in d’unu atteru logu, tenet unu ligonzu istrintu cun chie bistat in Sardigna.

S’assessora regionale a sas Carraduras Barbara Manca at nadu chi si trattat de unu passu in daenantis importante meda pro itte affortigat su cuntzettu de continuidade de s’iscrocca e tenet contu de su balore de sas famiglias in d’una iscrocca de isula comente sa Sardigna. Su risurtadu est fruttu de su tribagliu leadu a daenantis dae sa Regione Autonoma de sa Sardigna impare cun su Ministeru de sas Infrastrutturas e de sas Carraduras e sa Cummissione Europea, rispettande sas regulas europeas po sos collegamentos garantidos dae s’Istadu.

Ant a podere godire de sos pretzios aggiudados, cun d’unu accreschimentu minimu in cunfrontu a cussos istabilidos po sos chi bistant inoghe, ma cun d’unu pretziu massimu giai istabilidu, sos parentes fintzas a su terzu gradu. At a serbire a fizzos, babbos e mamas, frades e sorres, giagios e nepodes,tios e atteros nepodes. S’azzudu balet fintzas po maridos e muzzeres e po sos fizzos de sos famigliares chi tenent dirittu a s’iscontu.

Sa misura punnat a alcansare chie at dassadu sa Sardigna po motivos de tribagliu o de istudiu ma sighit a mantennere unu ligonzu forte cun s’isula, gai comente sas famiglias chi bivent partidas intre regiones divressas. S’intentu est de faghere divennere prus simple e prus pagu caru su viazu po chie depet torrare a domo pro motivos famigliares.

Sa cabuda de sos billettos a pretziu bassu affortigat duncas su dirittu a si podere movere in d’una regione chi po sa posissione geografica sua depet faghere sos contos cun collegamentos prus cumplicados e caros in cunfrontu a atteras zuras de s’Italia, azzuande non solu sos chi b’istant ma fintzas sas famiglias insoro.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22