Sas pastas de sa Sardigna: connottu, manos ischidas e identidade in donzi formadu.

Sa Sardigna est terra de pane e de pasta,de farras tribagliadas cun passentzia e sapientzia antiga, inube donzi formadu contat unu logu, un’istagione, unu zestu trasmittidu dae ingendras.

Attesu dae sas logicas industriales, sa pasta sarda est unu patrimoniu culturale chi bivet ancora oe in sas coghinas de sas famiglias, in sas festas de sasbiddas e in sas buttegas artesanales, cun numenes a s’ispissu in limba sarda chi iscopiant unu ligonzu fungudu intre forma, funtzione e iscrocca.

Intre sas pastas pius conas bi sunt sos culurgiones, beros e propios cofres de simula prenos, tipicos de s’Ozzastra. Sa cunzadura insoro a ispiga(o “sa spighitta”) est diventada una cona de abilidade manuale e identidade locale. Su prenu de su connottu, a base de patatas, casu de erbeghe, azzu e menta, arregrat su sapore de s’introterra sardu.

Un’atteru formadu antigu e de distintzione est cussu de sos malloreddus, a s’ispissu giammados puru “gnocchetti sardi”. Sunt conchizas pitticcas rigadas de simula e abba, cundidas cun tzaffaranu e bagna cun sartizza, tramatta e casu de erbeghe. In su nord de s’isula, in particulare in sa zura de su Logudoro e de su Meilogu, agattamos invetzes sos maccarrones de busa, una pasta longa e boida in sa parte de intro, chi si assimizzat ai bucatini, fatta allotturande s’isfoglia a inghiriu de unu ferru de carza.

Tipica de sa Barbagia est sa fregula, una pasta de simula turrada chi si assimizzat a su cous cous, fatta de pallinas pitticcas , fattas cun d’unu movimentu de sas manos intro de una conzedda de terracotta. Pius bolanzigas,ma ancora bivas gratzias a su tribagliu de sas feminas chi cunservant su connottu, sunt sas lorighittas, beras e propias operas de arte intritzadas a manu tipicas de Morgongiori, in Marmilla. Su numene insoro arribat dae “loriga” chi cheret narrere “ aneddu” o “chircu pitticcu”: donzi cantu est una trina serrada, fatta cun duos filos de pasta imboligados intre issos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Ballumene de isulas de sa Madalena: paradisu sardu intre abbas gristallinas e nadura innida.

Su ballumene de isulas de sa Madalena, chi si acciappat allargu de sa costa nord-orientale de sa Sardigna, affaccia a palau e a paga distanzia dae sa Corsica, est una vera prenda de su Mediterraneu e unu puntu de arrivu chi aunit bellesa nadurale, istoria e cultura. Cumpostu de pius de 60 isulas mannas e pitticcas, in meda de sas cales non bi istat niunu, faghet parte de su Parcu Natzionale de sa Madalena, una zura marina diffendida fatta po preservare s’ecosistema unicu e sa biodiversidade chi deffinint custas abbas.

Inoghe su mare si abbrandat in medas tonalidades de bleu e bleu-birde, mentres sa macula mediterranea e sas roccas assempiadas dae su bentu creant iscenas ammaghiantes. S’isula printzipale, Sa Madalena, est gameddada a sa Sardigna dae unu ponte chi partit dae Palau, e d’est su puntu de partentzia ideale po iscumbattare su ballumene de isulas. Su tzentru istoricu suo est un’intritzu de carrelas coloradas, pratas ispipillas e buttegas de artesanos inube iscoperrere sas tzeramicas, prendas e istoffas tipicas. Sa carrela panoramica chi l’inghiriat donat bistas chi che bogant s’alenu supra calas abbandadas e plajas de rena fine meda, chi andant bene po una frimmada in su sole o unu tuffu in s’abba gristallina.

Caprera, collegada a sa Madalena dae un’atteru ponte, est unu paradisu nadurale cun buscos carcos de oppinu, caminos de trekking e baias innidas.Intre sas pius famadas bi est Cala Coticcio e su resumene Garibaldinu, chi cunservat sa domo e sas cimerias de s’eroe de sos duos mundos. Spargi, inube non bi istat niunu, est una cofre de nadura innida, tzelebre po sas plajas suas comente Cala Corsara, Cala Soraya e Cala Granara, inube sa rena crara e su mare giaru creant iscenarios de cartolina.

Budelli est famada in tottu su mundu po Sa Plaja Arrosa, sucolore de sa cale est deppidu a picculos de corallu e conchillas. Sas isulas de Santa Maria e Razzoli, pius a norte, accisant cun sas bistas agrestes insoro, sos arroccarzos mannos e su faru chi dominat s’orizonte.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22