“Sindacopoli”, assolutzione de su tottu in Appellu: derruet su casteddu de accusas.

Una bortada istallida torrat a iscriere s’istoria de su protzessu “Sindacopoli”,chi in sos urtimos annos aiat iscuttinadu sa Sardigna, creande suspettos e condierras supra unu presumibbile intritzu de piagheres intre politica, amministrassione pubbrica e mundu de sas dittas. Sa Corte de Appellu de Casteddu at assolvidu tottu sos accusados, bortulande de su tottu sa sententzia de primu gradu chi aiat bogadu a fora su Tribbunale de Aristanis

Sos zuighes sunt bistados craros meda: “ Su fattu non bi est bistadu”. Sa detzisione sinzat unu cambiu de linea importante in cunfrontu a sa prima sententzia, chi aiat dadu penas pesantes meda po meda casos de piagheres ligados a porfias de appaltos,afficos e disignos pubbricos. A su tzentru de sas accusas, unu sistema presumidu de pretzebbos e piagheres chi diat aere interessadu amministradores locales, tennicos e meres de dittas chi tribagliaiant in medas comunes de sa Barbagia.

Assolutzione prena po tottu sos printzipales imputados de su protzessu. Sarbadore Pinna, inzenieri e mere de sa Essepi Engineering, in primu gradu fuit bistadu cundennadu a 7 annos e 6 meses po duos casos de piagheres. Cun issu, sunt bistados assoltos puru Rinaldo Arangino, ex sindigu de Belvì, a su cale aiant dadu 6 annos de presone, e Pier Paolo Sau, ex sindigu de Tonara, chi aiat tentu una cundenna a 4 annos e 3 meses.

Sa Corte at puru decraradu chi fuit passadu tempus meda po un’attera accusa chi interessaiat Pinna, Arangino e Pedru Crobu, ex vicesindigu de Ortueri, issu puru cundennadu  in primu gradu a 4 annos e 3 meses. S’apparitzu de sa sententzia est bistadu retzidu cun assulenu e suddisfassione dae sas defensas, chi dae tempus meda cuntestaiant sas accusas deffinindelas “ chidrinas e brivas de proas”. Cun sa pronuntzia de sa Corte de Appellu, su protzessu si serrat cun nudda de fattu po s’accusa, chi invetzes aiat contadu una retza ordiminzada bene de barattu de piagheres.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”