Eletziones provintziales a capudanne e bia libera a s’accabidu de su bilanciu: sa linea de sa Giunta Todde.

Sas eletzione po rennoare sas Provintzias sardas ant essere in cabudanne. Sa cunvocatzione uffitziale at arrivare intre sa fine de triulas, comente prenettat sa leze.

L’ at cunfirmadu sa presidente de sa Regione, Alessandra Todde, accabbadu s’addobiu de majoria chi si est fattu oe in Cunsizzu regionale, pagu prima de s’accorrada de sa Giunta. Todde at accraradu chi non si prenettant dilatas, pro itte donzi mudamentu de su calendariu de sas eletziones diat ispettare a su Cunsizzu regionale, e a custu mamentu no si est discutinde de cambiare sa leze. Su caminu addurat duncas deffinidu dae sa leze approada a innantis, chi ghiat sa colada dae sas Provintzias cummissariadas a organismos eleggidos.

In su mentre de s’addobiu, sa maggiorantzia at cundivididu su bisonzu de torrare a votare in manera deretta, intentu chi bi est fintzas in sa proposta fatta dae pagu de leze natzionale. S’intentu est cussu de binchere in manera deffinitiva sos effettos de sa leze Del Rio, chi medas de s’alleantzia cussiderant comente mesu de criticidade in sa conduida de sos entes locales. Intre sos temas accomettados fintzas sa situatzione de sos casi chentu
Comunes sardos chi ant a deppere votare s’annu imbeniente, una cosa chi aiat pesadu dudas supra sa partecipassione de amministratziones accanta a sas iscadentzias. Intames, sa Sardigna addurat s’unica regione italiana cun Provintzias chi sunt cummissariadas, cosa chi sos de sa majoria pensant chi no siat pius possibbile.

A su tzentru de sa zoronada puru s’accabidu de su bilanciu preparadu dae s’assessoradu ghiadu dae Zuseppe Meloni. Sa manovra, chi balet casi 800 miliones de euros, at essere approada a sero dae sa Giunta po che la podere mandare a sas cummissiones chi tenent sa cumpetentzia. S’intentu est de alcansare unu bia libera in presse dae s’Aula, rispettande sas iscadentzias de s’esercitziu finantziariu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Ozzastra terra de istoria: sos printzipales sitos archeologicos de bisitare intre nuraghes,biddas antigas e monumentos de sa tzivilidade nuragica.

S’Ozzastra est una de sas zuras de sa Sardigna prus riccas de istoria antiga. In cust’iscrocca si agattant sitos archeologicos meda chi contant sa vida de sas populassiones chi istaiant in s’isula mizza e mizza de annos faghet.

Intre montes, campedas e campagnas si podent biere nuraghes, tumbas de tzigantes, tumbas antigas irfossadas in sa rocca e restos de biddas. Bisitare custos logos est commente faghere unu biazu in su passadu e connoschere menzus s’istoria de sa Sardigna e de sas tzivilidades chi ant bividu s’isula prima de s’arrivu de sos romanos.

Unu de sos sitos prus connoschidos est su Nuraghe Ruinas, chi si agattat in s’iscrocca de Arzana. Custu nuraghe est unu de sos prus artos de sa Sardigna e si agattat in d’una posissione crara dae sa cale si podent biere sos montes de su Gennargentu. In s’iscrocca de Triei si agattat sa Tumba de sos Tzigantes de Osono, unu de sos monumentos de interru prus importantes de s’Ozzastra. Un’atteru situ interessante meda si agattat in s’iscrocca de Bari Sardo, inube bi est su Nuraghe Sellersu. In s’iscrocca de Cardedu si agattat invetzes sa Necropoli de Monte Arista, una zura in sa cale sunt bistadas agattadas tumbas meda irfossadas in sa rocca.

Intre sos sitos prus importantes de s’Ozzastra bi est fintzas su cumplessu archeologicu de s’Ortali’e su Monti, in s’iscrocca de Tortolì. Si trattat de unu de sos sitos prus bisitados de sa zura e accansat monumentos divressos intre sos cales unu nuraghe mannu, una tumba de sos tzigantes e restos de biddas antigas. Importante meda est fintzas su situ archeologicu de s’Arcu ‘ e is Forros, in s’iscrocca de Villagrande Strisaili. Custu logu fuit una bidda nuragica manna chi in passadu teniat fintzas unu rolu religiosu e de negossiu. Sos archeologos ant agattadu restos de cresias, magasinos e buttegas po tribagliare sos metallos.

S’Ozzastra est duncas un terra ricca de testimonzas archeologicas chi permittint de iscoperrere s’istoria prus antiga de sa Sardigna. Sos nuraghes, sas tumbas e sas biddas antigas sunt unu patrimoniu pretziosu meda chi contat s’issida de s’isula. Bisitare custos logos cheret narrere connoschere menzus su tempus passadu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22