Un’organissasione criminale abbarbada in su mesudie de sa Sardigna, ma cun coffuzones internatzionales fortes in Belgio e Paesi Bassi, est bistada iscupulada in d’una operassione padria dae parte de sas fortzas de s’ordine chi ant arrestadu tres pessonas e at secuestradu benes po pius de tres miliones de euros. Secundu cantu ant nadu sos de sa politzia, sa truma fit responsabbile de aere battidu in Sardigna una cantidade manna de cocaina, po unu totale de 77 chilos.

Sa droga beniat carrada cuada supra de camions mannos chi partiant dae su nord Europa, passande divressas frunteras fintzas a arribare in s’isula.

Una borta arribada a destinu, sa cocaina beniat bendida in su mercadu locale, cun d’unu balore tantadu intre tres e ses miliones de euros. S’iscrucculla at permittidu de assebertare un’organissasione de otto pessonas, tres de sas cales abbisadas comente fundadores de s’attividade illetzida, mentres atteras chimbe diant aere tentu rolos de azzudu de s’organissasione. Sa truma, mancari esseret discreta meda, fuit istrutturada bene e teniat fintzas cabbales accolomicas de signifficu.

Sas iscruccullas ant difattis battidu a su secuestru de pius de 90 parados, intre domos e terrinos postos a su pius in su mesudie de s’isula, paris a paritzos camions e disponibilidades de dinari. Una parte de su patrimoniu, chi si pensat siat de sas pessonas sutta de iscrucculla, est bistada agattada fintzas in sos Paesi Bassi. In su mentres de sas attividades de iscrucculla sunt bistados secuestrados puru vinti chilos de cocaina sinchera meda, mentres tres curreos incarrigados de che leare sa cocaina sunt bistados arrestados.

S’organissasione impittaiat maneras diligadas, impittande macchinas modificadas po cuare sa droga e chircande de faghere faddire sos controllos po mesu de caminos istudiados in tottu sos particulares.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Valentina Greco at essere intesa oe dae sas autoridades italianas.

Sa femina casteddaja disparrida po deghe dies est bistada accattada eris in sa domo sua de Tunisi. Est in cundissiones bonas. Sos de sa familia sunt arrivados in Tunisia. Diat podere essere intesa giai oe dae sas autoridades locales Valentina Greco, sa femina naschida in Casteddu disparrida in Tunisia po deghe dies e acciappida in sa die de eris in sa domo sua in Tunisi. Pustis de dies de arreolu, s’accattu de sa femina de 35 annos at battidu unu primu mamentu de assulenu po sos familiares.

Ascurtande cantu narat zente chi est accanta a sa familia, sos parentes de sa femina sunt arrivados in Tunisia po l’istare accanta e l’azzuare in sos momentos pustis de s’accattu. Sos primos accertamentos meigos ant cunfirmadu chi sas cunditziones fisicas sunt bonas, e sa femina non depet essere curada in s’ispidale. Po su mamentu non sunt bistados isparghidos nuntzos supra s’istadu suo psicologicu, ma si diat trattare de un’isettu supra su cale sas autoridades sunt andande a daenanti cun cautela e garbu mannu.

Sas sumanas de sa disparrida sunt de accrarare. Valentina Greco fit disparrida in su nudda su 9 de triulas passadu, chentza dassare andalas. Sa cramida fit bistada dada dae amigos e cumpanzos de tribagliu chi no resessiant pius a si ponnere in cuntattu cun issa. In sas dies imbenientes, sa familia aiat isparghidu appellos pubbricos dimandande azzudu po la accattare, mentres sa Farnesina e s’ambasciada italiana in Tunisia sighiant su casu dae accurtzu, semper in cuntattu cun sas autoridades locales.

Su fattu chi sa femina siat bistada accattada propriu in domo sua pesat como dimandas importantes: inube fit bistada in custas deghe dies? Fuit deabberu disparrida o si fuit istesiada po volontade sua? Propriu po accrarare custos puntos de fundamentu, sas autoridades tunisinas ant preparadu unu negossiu uffitziale cun issa, chi si diat podere faghere giai in sa die de oe, mancari non bi siant imprevedios.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22