Est uffitziale: Fabio Pisacane est s’allenadore novu de su Casteddu.

Su Casteddu Fubbalu at cunfirmadu su numene de s’allenadore novu:at essere Fabio Pisacane a ghiare s’isquadra in s’istagione imbeniente. S’ex diffessore ruju blau at firmadu unu cuntrattu chi balet fintzas a su 30 de lampadas 2026, cun annou automaticu po un’attera istagione si arribat a scoppos isportivos ispecificos. Pisacane leat su logu de Davide Nicola, pesadu dae s’incarrigu.

Naschidu in su 1986, napoletanu, Pisacane est una cara bene connoschida dae sos tiffosos casteddajos. Comente giogadore at fattu pius de 430 partidas intre sos proffessoneris, de sas cales pius de 150 cun sa maglia de su Casteddu. Arribadu in Sardigna in s’istiu de su 2015, est bistadu interprete de sa promossione in serie A in su 2016 e at dadu su contribbudu suo in manera detzisiva a faghere addurare s’isquadra in sa serie A in sas istagiones imbenientes,incarnande a su menzus sos balores de su club.

Finita sa carriera sua dae giogadore, Pisacane at incumintzadu in presse su caminu de allenadore, semper intro de s’organismu tennicu ruju e blau. In su mese de triulas 2022 est bintradu a faghere parte de s’istaff de sa prima isquadra comente assistente tennicu, sezzindesi puru supra sa banchina in sa partida binchida contra su Cosenza, prima de s’arrivu de Claudio Ranieri.

Pustis de essere bistadu in su settore zovanile, in su 2023 est divennidu viceallenadore de su Beranu, e pustis at leadu sa ghia in s’istiu de su mattessi annu. In duas istagiones at conduidu sos zovanos ruju blau a duos settimos postos unu fattu de s’atteru, iffrisande s’intrada a sos play off po s’iscudettu. Sa meraviza sua, peroe, est arrivada in su mese de Abrile cando at conchistadu sa Coppa Italia Beranu: una binchida istorica, sa prima po su club in custa cumpetissione, binchinde cun su Milan po 3-0 a s’Arena Brera de Milano.

Como, po Pisacane si abberit una porfia nova, cussa de battire galabera e solidesa a sa ghia de sa prima isquadra de su Casteddu. Cun issu su
club puntat a fraigare unu disignu tennicu fundadu supra identidade, appartennentzia e creschida.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sas Prendas Arkeològicas de Cràbas ant a èssere sas printzipales in Danimarca.

Unu pùbbricu meda e abbizosu at pigadu parte giòvia coladu a s’Istitutu italianu de Cultura de Copenaghen a s’addobiu dedicadu a sas prendas arkeològicas de Cràbas e a su Parcu arkeològigu naturale de su Sinis, cunfirmande s’interèssu forte internatzionale pro s’istòria e s’identidade de sa
Sardigna. S’initziativa, insertada in s’abbenimentu “Sardigna: s’istòria, sa trama” e fatta gràtzias a sa collaboratzione intre assòtzios culturales e
istitutziones, at rapresentadu una occasione importante de faveddu po bandire su patrimòniu sardu in fora de s’isula.

Sa serana at postu in lughe cantu siat importante contare sa Sardigna a foras de sos assettios regionales e natzionales, non solu comente logu turìsticu ma comente logu de tziviltades antigas, de iscobertas arkeològicas de importu internatzionale e de connottos culturales ancora arradigadas in manera funguda in su presente.

Po mesu de su contu de sos logos printzipales de su Sinis, dae Tharros a sa zura arkeològiga de Mont’e Prama, passande pro museos e logos chi
rappresentant s’iscrocca, su pùblicu danesu at pòtidu cumintzare unu viàzu ideale intre coladu e presente, cumprendinde su balore universale de unu
patrimòniu chi non apartenet solu a sa Sardigna ma a totu su cadinu de su Mediterràneu.

Accanta a s’arkeologia, logu meda est bistadu dedicadu fintzas a sas issidas artìstigas de oe, dae su tzinema a sas artes immaginativas fintzas a sa
mùsica, evidentziande comente sa cultura sarda non siat un’erèntzia cristallizzada in su tempus coladu ma una realidade bìva, capatze de si rennovare e faeddare cun su presente. Custu intrizu intre istòria e moda afortigat su nuntzu de una Sardigna chi cambiat, cabosa de sas raighinas suas e a su matessi tempus aberta a su mundu.

Abbenimentos comente custu dimustrant s’importu de sa cooperatzione intre istitutziones, assòtzios culturales in su fraigare caminos de balorizatzione cumpartzidos e chi durant. Leare sa cultura sarda a su forastigu cheret nàrrere difatis afortigare sos ligàmenes cun sas comunidades internatzionales, favoressere sa connoschèntzia pare-pare e dare unu contribbudu a una diplomàtzia culturael fundada subra su rispetu e s’iscàmbiu.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”