Sa Sardigna accomettat una de sas pius graves crisis de s’abba de sos urtimos annos.

A daenanti de s’emergentzia chi est creschinde ligada a sa mancantzia de s’abba, sa Giunta regionale ghiada dae Alessandra Todde at abbisadu sa presentatzione luego de unu disignu de leze istravanadu e apprettosu po affortigare sa capatzidade de interventu de sas organizassiones incarrigadas de su controllu de sas disponibilidades de s’abba.

S’initziativa, promovida dae s’assessoradu de sos Tribaglios pubbricos, puntat a accomettare cun misuras desampladas una situatzione semper pius critiga mescamente in su nord de s’isula. Su provvidimentu de leze at essere orientadu a affortigare su rolu de s’organizassione de s’abba de sa Sardigna (ENAS), po mesu de s’assignadura de funtziones operativas in su campu de sa Protetzione Tzivile.

Custu at a cunsentire a s’organizassione de attivare in presse meda disponibilidades economicas e tennicas novas, derettadas a garantire sa continuidade de s’approvistamentu de s’abba in sas zuras corpadas de pius, in manera particulare in su Tattaresu. Inoghe, sa mancantzia de s’abba est giai atziande discumbenios de signifficu a sa populatzione, a su campu de sa laurantza e atteros campos produttivos.

Intre sos motivos printzipales de sa crititzidade de oe bi sunt fintzas sos interventos chi sunt faghinde subra su cunduttu de su Coghinas, finantziados dae su PNRR. Mancari de fundamentu po su rennobamentu de sos impiantos de s’abba, sos tribaglios sunt cajonande interrutziones e segadas novas de sa retza, immanniande de pius sa debbilesa de su sistema. Sas autoridades regionales evidentziant comente s’istruttura de como de s’Enas, non siat oe pronta a accomettare cun su bonu puntu netzessariu sos disaccatos e sos imprevidios chi si sunt aberguande.

Su disignu de leze chi sunt preparande s’inficchit duncas in d’unu cuadru de urgentzia e puntat a columare unu boidu operativu e de sas regulas, permittinde a s’Enas de faghere in tempos lestros e cun autonomia mazore.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Benito Urgu, unu de sos comigos prus connoschidos e appretziados de sa Sardigna.

Attore, cabarettista e tzelebridade televisiva, in sos annos est divennidu populare meda gratzias a sos ispettaculos ispassiosos suos e a sas friguras chi contant cun iscrombu sa vida de donzi die in s’isula. Naschidu in Aristanis, Urgu at incuminzadu sa carriera sua in su mundu de s’ispettaculu medas annos faghet. Fintzas dae s’incumintzu at leadu supra de su cataffale una comicidade simple e ispontanea, a s’ispissu ispirada a sa manera de faeddare,costumenes e situassiones tipicas de sa Sardigna.

In sos sketch suos contat cun lepiesa sa vida in sas biddas, su connottu e sas iscenas pitticcas de donzi die, iscenas in sas cales medas pessonas resessint a si reconnoschere in manera fatzile. In su mentres de sa carriera longa sua at partetzipadu a medas ispettaculos teatrales, programmas televisivos e in sa radio.

Cun sa manera sua de faghere nadurale e s’humor derettu est resessidu a conchistare su pubbricu de tottu s’isula. Meda de sas friguras suas sunt divennidas connoschidas pro itte presentant in manera chi divertit su meledu e sos comportamentos de sa zente sarda.

Sa comicidade de Benito urgu si fundat supra trempas simples e istorias chi naschent dae sa vida de donzi die. In sos ispettaculos suos faeddat a s’ispissu de sa vida in sas biddas, de su connottu e de su cambiu de sa sotziedade. In medas occasiones impittat fintzas paraulas e maneras de narrere de sa limba sarda, faghinde divennere sas mustradas suas fintzas prus accurtzas a sa cultura e realidade de s’isula.

Cun su colare de sos anno est divennidu unu puntu de relata po sa comicidade in Sardigna. Sos ispettaculos suos sighint a essere sighidos dae medas pessonas e sunt unu mamentu de divertimentu ma fintzas una manera po contare cun iscrombu sa vida e sos cambios de s’iscrocca. In prus de sa comicidade, Benito Urgu at semper mustradu attentzione meda pro sa cultura e su connottu de sa Sardigna.

Pro mesu de su tribagliu suo ad dadu unu contribbudu pro faghere connoschere e balorizzare mamentos importantes de s’identidade de s’isula, battinde supra de su cataffale istorias e situassiones chi faghent parte de sa vida e de sa memoria de sas comunidades locales.

Cun sa forma simple sua, deretta e ispontanea, Benito Urgu at fraigadu una carriera longa in su mundu de s’ispettaculu. Fintzas oe est cussideradu una de sas caras prus connoschidas de sa comicidade sarda e sighit a essere appretziadu dae pessonas de ingendras divressas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22