Museu de su Costumene de Nugoro: biazu in su coro de sa cultura sarda.

In su tzentru de Nugoro, su Museu de su Costumene, chi est connottu comente Museu de sa Vida e su Connottu Populare Sardu, est su pius de importu museu etnograficu de s’isula. Abbertu in su 1976 e annoadu in su 2015, est una frimmada de fundamentu po chie disizat de connoschere s’istoria e s’identidade de sa Sardigna.

Su caminu de s’esposissione s’isfroscat in deghe salas tematicas, chi apparant una bisione cumprida de sa vida e de su connottu de sa Sardigna: dae su tribagliu de donzi die a sa festa, dae sa religiosidade a sa cosa de pappare, passande po sos bistires e s’artesanadu. Pius de 5.000 oggettos mustrant in manera chi interessat s’universu culturale de s’isula, intre mustradas iscenograficas e ambientaziones chi parent beras.

Intre sas setziones pius de signifficu, una sala est dedicada a sa produssione e decoradura de su pane, cun 350 panes de su connottu chi arribant dae collessiones pubbricas e privadas. Logu mannu est reservadu a sa tessidura, cun istrumentos e pannos antigos, mentres  su pranu de supra accasazat una collessione istravanada de 54 bistires de su connottu esponnidos in d’una vitrina manna chi ammentat unu corteu proffiscionale.

Sa bisita sighit cun su fraigu novu de una “cumbessia” e una zura dedicada a sa devossione populare in sas cresias de campagna, cun pius de 450 prendas e coccos, oggettos liturgigos e alascias sacras. Una de sas salas pius de signifficu est cussa dedicada a su Carrasegare
de sa Barbagia, inube sunt esponnidas sas caratzas tipicas de sos Mamuthones e Issohadores de Mamuiada, de sos Boes e Merdules de Otzana, de sos Thurpos de Oroteddi e de su Bundu de Orane, chi sunt presentadas dae modellos chi parent chi siant ballande.

Su museu est dodadu de una intrada moderna, bookshop, salas po esposissiones a tempus e logos po abbenimentos, apparande a su pubbricu un’esperientzia culturale ricca e chi faghet accabussare in su coro de sa Sardigna.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Iscoperta una necropoli in su Nord Sardignain su mentres de sos tribaglios po un’approntu solare.

Un’iscoperta archeologica importante meda est bistada fatta in su Nord Sardigna in su mentres de tribaglios ligados a sa produssione de energia pulida. In sa zura industriale de truncu Reale-Sant’Agostino, accanta a Tattari,sos iscavos de ammaniada pro fraigare un’approntu solare ant fattu bessire a pizu una necropoli chi fintzas a oe non fuit bistada mai iscoperta.

S’accattu est sutzessu in sa zura curada dae su Consorziu Industriale de Tattari. Sos iscavos sunt incumintzados in su mese de martu de su 2024, cando sunt bistados cunviados sos controllos de su terrinu prima de fraigare s’impiantu. In su mentres de custos controllos sos archeologos ant acciappidu istrutturas sutta de terra e, sighinde cun sos iscavos, ant cumpresu chi si trattaiat de unu logu antigu de tumba.

Secundu su chi pensant sos espertos, su logu est importante meda po s’istoria e s’iscentzia. In sa zura sunt bistadas agattadas tres tumbas mannas iscavadas in sa rocca, istrutturas mannas chi faghent pensare a tumbas de balore mannu po sas populatziones chi biviant in custa zura in s’antichidade. S’iscoperta est fintzas prus interessante pro sa presentzia de decorassiones fittadas supra sas barras’e muru de sas tumbas. Si trattat de signos e pintas fittados in sa rocca in sos seculos passados. Custa fittadas faghiant parte de su connottu de sos interros de sas populatziones antigas de sa Sardigna e a s’ispissu teniant unu signifficu simbolicu o religiosu.

Po sos istudiosos custos elementos sunt importantes meda pro itte podent azzuare a cumprendere menzus comente biviant sas comunidades de su tempus passadu e cale esserant sas credentzias insoro. Sas tumbas e sas decorassiones diant podere dare novas supra su connottu, sa cultura e sa vida de sas pessonas chi biviant in s’iscrocca tattaresa mizza e mizza de annos faghet.

Sos archeologos ant a sighire a istudiare sa zura e analizzare tottu su chi est bistadu acciappidu in su mentres de sos iscavos. Donzi particulare novu diat podere accreschere sas informatziones chi serbint pro fraigare s’istoria de su logu. Custa iscoperta mustrat un’attera borta cantu sa Sardigna siat ricca de testimonzas de su passadu. Fintzas in su mentres de tribaglios modernos, comente cussos ligados a sa produssione de energia, podet capitare de acciappare andalas de tziviltades antigas meda chi contant s’istoria longa de s’isula.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22