Unu ntzaurru mai osservadu prima est bistadu iscopertu supra s’Istatzione ispatziale tzinesa Tiangong.

Custu ntzaurru est una novidade aggioccante po sa microbiologia ispatziale e diat podere essere utile in sos biazos chi durant tempus meda. Sos iscientziados no ant ancora determinadu si  siat  maduradu in orbita o si eppat viazzadu fintzas a s’istatzione comente una ispora, chi giai teniat sas calidades tipicas suas. Cussu chi est certu est chi tenet un’abilidade unica: resessit a illaunire sa gheladina po nde bogare azoto e carbonio, duos elementos de fundamentu po sa vida. Custa capatzidade li permittit de creare unu biofilm de protessione, un’ispetzie de “cogocciu” in su cale si cuare in cunditziones ambientales inimigas.

Est de interessu nodare chi, in cunfruntu a sos parentes terrestres suos, custu at perdidu sa capatzidade de usare atteras funtanas de arrancu. Custu indittat chi s’ambiente ispatziale at seperadu arrangios dislindos, cunfirmande sa capatzidade istravanada de sos ntzaurros de  madurare puru in habitat urtimos comente sas istatzione chi girant a inghiriu de sa terra.

S’iscoberta est posta in d’unu cuadru pius mannu de attentzione assa parte de sa microbiologia ispatziale. Pagas dies faghede, sa NASA at pubbricadu un’istudiu chi nunziat s’iscoperta de 26 castas novas de ntzaurros. Fintzas in cussu casu, sos ntzaurros ant mustradu una capatzidade chi aggioccat de bivere in ambientes bitzos meda, gratzias a sos genes assotziados a s’accontzadura de su DNA e sa resistentzia  a sustantzias tosigas.

Si non sia diat iscobiare  causa de una maladia, s’istudiu suo diat podere dare motivos po prozettare ambientes inube si podet bistare bastantes in s’ispatziu, comente sas bases de sa luna o de marte de su tempus benidore. Su biofilm de affianzu suo e sa capatzidade de assimilare sustantzias cumplessas diat podere abberrere su caminu a biotecnologias novas po s’affianzu de sos echipaggios e su recuberu de sos benes.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22