Pier Giorgio Pulixi triunfat un’attera borta a su “Ceresio in Giallo” cun sa libreria de sos battos nieddos.

Sa rassigna abbisat un’edissione ambulante intre s’Italia e s’Isvizzera. Pier Giorgio Pulixi si cuffirmat pessone printzipale assoludu in sa bista de sa litteradura italiana binchinde,po sa secunda borta, su primu premiu a su cuncursu internatzionale Ceresio in Giallo. Cun su romanzu La libreria dei gatti neri, s’iscrittore sardu binchet s’edissione 2024-2025 de sa rassigna dedicada a s’istoria groga, niedda, thriller e de politzia, annoditandesi in mesu de pius de 500 operas in sa porfia.

Unu riconnoschimentu chi arribat a duos annos de distantzia dae sa prima binchida sua in sa mattessi porfia,a testimonia de sa tzentralidade affortigada sua in cussa zenia. Su cuncursu si est affirmadu comente unu de sos addobios pius isettados dae sos appassionados de su grogu de autore. Sa bogada a campu no solu premiat s’eccellentzia de sa contassia, ma si proponnet fintzas commente una vitrina po talentos novos e po operas capatzes de iscumbattare sas tonalidades de su crimene litterariu cun originalidade e fundaria.

Supra sa peagna de su campu dedicadu a sos romanzos pubbricados,Pulixi est bistadu sighidu dae atteros duos nomenes de gabbale de sa bista italiana: Fabrizio Roncone, secundu classificadu e Nicola Calathopoulos, chi at binchidu su terzu premiu. Piergiorgio Pulixi, naschidu in Casteddu in su 1982, est oe cunsideradu unu de sos iscrittores italianos chi influentzant de pius de s’ingendra nova niedda e thriller. Pustis de un’esperientzia longa intre Milano e sa terra sua, oe bivet semper in Sardigna, inube sighit a iscriere romanzos e contos chi scalint semper sas classificas de sas bendidas.

Cun d’una iscrittura affilada, ritimada e attenta a sa misura psicologica de sos suzettos, Pulixi si est retagliadu unu logu de gabbale fintzas a livellu europeu. Est intre sos autores pius bendidos in Italia in sa zenia e a s’ispissu partetzipantes importantes meda de festival litterarios, addobios e dibattidos culturales.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sas Domus de Janas diventant Patrimoniu de s’Umanidade: sa Sardigna conchistat su 61° logu UNESCO italianu.

Sas Domus de Janas, tumbas preistoricas antigas meda, iffossadas in sa rocca, sunt bintradas in manera uffitziale in sa Lista de su Patrimoniu Mundiale de s’UNESCO. Su reconnoschimentu est bistadu assinzadu deris in Parigi, in su mentres de sa 47a accorrada de su Comitadu de su Patrimoniu Mundiale. Cun custu resurtadu importante meda, s’Italia affortigat sa superioresa sua in su mundu, segudande 61 iscrittos in sa Lista de grandesa de s’UNESCO.

Su situ  novu, mentovadu “Connottu teju in sa Preistoria de sa Sardigna: sas Domus de Janas”, regollit imparis paritzas tumbas ipogeas, presentes in totta s’iscrocca de sa Sardigna, in manera particulare in sa parte tzentru nord de s’isula. Sas Domus de Janas, traduidas comente “case delle fate”, sunt istrutturas tumbales ipogeicas chi appartenent a su Neoliticu Mediu I(V millenniu a.C.), fattas cun iffossos derettos in sa rocca. S’architettura insoro est cumplessa meda, e sas decorassiones e s’ispartighinadura in s’iscrocca, contant s’ispiritualidade, sos ritos e s’istruttura sotziale de sas comunidades preistoricas sardas.

Si trattat de sa testimonia pius manna de architettura de tumbas ipogeicas in su Mediterraneu occidentale. Sas tumbas, a s’ispissu attruppadas in necropoli, funt collegadas a logos bividos e logos de cultu. Sos istudios archeologicos pius reghentes mustrant chi custas istrutturas sunt bistadas impittadas po seculos, puru in tempos imbenientes, fintzas a s’incumintzu de s’edade nuragica. In casos meda sas tumbas sunt bistadas mudadas, torradas a faghere o impittadas, testimonzende sa cultura e sas trasformassiones rituales in d’unu tempus longu meda.

S’insertu de sas Domus de Janas in sa lista de sos benes Patrimoniu de s’Umanidade, mustrat non solu unu reconnoschimentu culturale importante, ma fintzas un’opportunidade de faghere connoschere de pius tottu s’isula.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22