Domusnovas est allorigada in su dolore po sa disparida drammatiga de Gianluca Murru, 36 annos, chef zovanu naschidu in sa bidda, mortu su sero de su 9 de maju in d’unu drammatigu incidente istradale in Mentone, Costa Biaitta, a pagos chilometros dae s’affrontadura italiana.

Murru biazaiat supra sa Yamaha R1 sua cando, po motivos chi sunt ancora chircande de cumprendere, at perdidu su controllu de sa moto iscudindeche supra de un’attera moto chi fuit parchizada. Su corpu no li at dassadu iscampu: mancari s’arrivu lestru meda de sos succursos, donzi tentativu de lu salvare, no est serbidu a nudda.

Su nuntzu de sa morte sua at fattu a sa lestra su giru intre amigos, cumpanzos e connoschentes, bogande a fora cummossione manna in Frantza e dolore mannu in Domusnovas, inube Gianluca fuit creschidu e inube vivet una parte manna de sa famiglia sua. Medas, in custa oras, sunt espressande su dolore insoro, ammentande unu piccioccu gentile, solare, appassionadu de su tribagliu suo e determinadu a si fraigare una carriera in su mundu de sa coghina arta.

Sa sua fuit un’istoria de impignu e dedissione. Pustis de aere dassadu sa Sardigna cando fuit ancora zovanu, Gianluca aiat bividu po meda tempus in Ventimiglia, inube aiat incumintzadu a si faghere connoschere in su campu de sa coghina. Su talentu suo e sa gana de si mezzorare che lu aiant leadu pius a tardu in Frantza, a paga distantzia dae Montecarlo, inube tribagliaiat commnet chef in su ristorante Marlow, unu logu apprezziadu meda in su Printzipadu de Monaco. In su tempus si fuit balanzadu s’istima de sos cumpanzos e de sos clientes, gratzias a sa cretividade sua in coghina e sa proffessionalidade cun sas cales accomettaiat donzi zoronada.

S’arrisu e sa passione sua ant addurare cosas chi non si podent iscancellare in s’ammentu de chie at tentu sa foruna de lu connoschere. In sa Costa Biaitta, comente in Ventimiglia, sunt medas sos chi lu pranghent cun affettu berteru: amigos, cumpanzos e meres de ristorantes chi aiant cundivididu cun issu, no solu su tribagliu, ma fintzas momentos de amigantzia bera.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”