Terranoa puntat in artu: partit su cursu novu de laurea in Aeronautica.

Terranoa affortigat su rolu suo de polu universitariu e de fundamentu po sa formatzione tennica-iscentifica in Sardigna. Pustis de s’attivassione de su cursu de laurea in Inzennieria navale, sa tzittade si approntat a accollire unu caminu accademicu dedicadu a su campu aeronauticu, gratzias a s’assistentzia de s’Universidade de Casteddu. Su nuntziu uffitziale est arrivadu su 2 de Maju, in su mentres de sa mustra nautica de Sardigna in Porto Rotondo.

Su direttore de s’Universidade de Casteddu, Frantziscu Mola, at cunfirmadu sa disponibilidade de s’Universidade po faghere incumintzare su cursu, evidentziande comente s’initziativa rispondat a una bisione de isviluppu de s’iscrocca poderadu dae sa formatzione de calidade e dae sa modernidade. Su disignu at tentu s’accottu cumbintu de sas istitussiones locales e regionales, cun su sindigu de Terranoa, Settimo Nizzi, e su Vice presidente de sa Regione Zuseppe Meloni, chi ant espressadu adesione prena.

S’introduissione de su cursu de laurea in Aeronautica est un’atteru passu a daenanti po fraigare un’offerta formativa chi punnat a campos istrategicos de sa carradura, de sa mobilidade e de s’inzennieria avanzada. In d’unu cuntestu comente cussu gadduresu, chi tenet una bocassione turistica, de disposissione e portuale, sa presentzia de unu cursu basadu supra s’aeronautica at a podere creare cooperassiones novas intre universidade, dittas e mundu de su tribagliu.

Terranoa affortigat gai su proffilu suo de tzittade universidaria de su nord Sardigna, chi podet attirare istudiantes zovanos e imbestimentos in formatzione. Su cursu no at essere solu un’occasione accademica, ma puru un’ispinta po s’isviluppu de s’iscrocca, gratzias a sa possibilidade de frommare friguras proffessionales ispecializzadas meda, sas cales sunt chircadas in d’unu campu chi est semper in mezoramentu comente cussu aerospatziale.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22