Frades Deiana disperdidos in mare: si sighit a chircare, un’atteru appellu de sos familiares.

Sighit su secacoro chentza fine po sas famiglias e sos amigos de Zuseppe e Larentu Deiana, sos duos zovanos frades de Terranoa, de sos cales si sunt perdidas sas andalas in mare dae pius de una chida. Sos accabussadores de sa Bardia Costiera, iscansabbiles, ant sighidu sos accabussos in sos logos pius bischidos, mentres sos volontariosa ant fattu iscuttas novas de ispegulizamentu, in mare e in terra. Sas chircas si sunt cuntzentradas in su trettu intre Cala Ispada, Cala de su Sonnu, Punta de India e s’isula de Figarolo, un zura chi est divennida su coro de sas operassiones. In azzudu de sas isquadras uffitziales si sunt azzuntos puru piscadores locales, chi cun sas retzas insoro a istrasinu sunt azzuande po cherrinzonare su fundu de su mare.

Bellechì s’impignu postu in campu e sas accabussadas, fintzas a custu momentu non sunt bessidos a pizu elementos chi potant faghere andare a daenanti sas scruccullas. Intames, sos succurridores sunt cunvintos chi siat su logu zustu inube chircare, pensande a sas tragonajas de su mare, de sos bentos chi bi sunt bistados sas dies passadas e de sos urtimos castios.

Parallalamente, dae parte de sos familiares arribat un’appellu novu, carrigu de apprettu e isperantzia. S’abbocadu Piero Cherchi, chi assistit su babbu e sa mama de Zuseppe e Larentu, at ghettadu una rechesta a calesisiat pessona pottat mancari chentza lu cherrere aere regortu informatziones utiles. Sa die de sa disparida de sos duos frades, sapadu 19 de Aprile, sa die prima de Pasca, in sa zura de capo Figari bi fit una “passizzada botaniga”, un’abbenimentu de passizzu chi at attiradu zente meda. S’abbocadu duncas imbidad sos chi esserent bistados presentes in Capo Figari a controllare sas fottografias chi ant fattu e a si presentare. Sa comunidade de Terranoa addurat iscuttinada e sa famiglia de sos duos piccioccos disisperada.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22