Naschet su Cunsizzu de sos Zovanos de Casteddu: Unu logu novu de partecipatzione e cunfrontu.

Est bistada fatta in s’ Aula Consiliare de archida de su Comune de Casteddu sa prima setzida pubbrica de su Cunsizzu de sos Zovanos, unu organismu naschidu dae pagu cun s’intentu de favoressere su faeddu intre sas  ingendras novas e s’amministratzione comunale. Su Cunsizzu at essere istrumentu de cunfrontu e cundivisione intre piccioccas e piccioccos de sa tzittade e sas istitutziones.

In su mentre de sa setzida de sa prima borta, si est fintzas votadu po sos incarrigos direttivos printzipales. Davide Floris, 22 annos, est bistadu elegidu presidente, mentres su rolu de vice est bistadu assinzadu a Christian Colandrea, de solu 18 annos.

S’istrussione de su Cunsizzu, naschet dae sa volontade de s’amministratzione comunale de faghere partetzipare in manera attiva sos zovanos in sas detzisiones chi pertoccant sos zovanos e sa vida de sa tzittade. Custu organismu at a tennere s’impignu de bogare a pizu ideas novas, initziativas e disignos po mezorare sas cunditziones de vida de sos zovanos casteddajos, favoressende sa partetzipassione attiva a sa vida de sa comunidade.

S’intentu printzipale est cussu de creare unu ponte intre sas ingendras novas e sas istitussiones, permittindeli de espressare sas esigentzias insoro e de indittare solussiones in campos importantes comente sa formassione, sa cultura, su tribagliu, s’incluisione sotziale, s’isport e su sustentamentu. In pius, su Cunsizzu at a podere dare indittos a sos cunsizzeris de su Comune, dande unu contribbudu a indissiare sas politicas pubbricas in manera chi siant pius accantu a sos bisonzos de sos piccioccos.

A sa setzida de s’inconimtzu bi funt fintzas su sindicu Massimo Zedda e s’assessora a s’Istrutzione Pubbrica Giulia Andreozzi, chi ant espressadu s’accottu insoro a s’initziativa. Sa naschida de su Cunsizzu de sos Zovanos est duncas unu passu de signifficu a sa parte de una tzittade de Casteddu pius incluisiva e partetzipativa, in sa cale sos zovanos no siant solu ispettadores, ma interpretes de su mudamentu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22