In Sardigna s’iscreening arribat in presone gratzias a su Metaverso

Su programma de screening po sa prevensione e sa balutatzione primidia de su bugnu a su “colon retto” de sa ASL de Nugoro segudat unu puntu de arribu novu, arrivande fintzas a sos presoneris de sa presone de Mamone. Lunis est bistada avviada s’atzettassione de sos malaidos po su primu livellu de s’iscreening, apparande po issos unu camminu de controllu e osservatzione intro de sa presone.

S’initziativa si distinghet po s’impittu de sa realidade virtuale, gratzias a sa presentzia de su Metaverso, istrumentu impitadu po sa prima borta s’annu passadu e como impitadu po mezzorare s’intrada a sas curas fintzas in sas presones. Custu sistema novu at a permittere a sos presoneris de retzire assistentzia sanidaria in manera pius lestra e balida, binchinde medas de sos impedimentos tipicos de sas presones.

S’elementu revolussionariu de custa campagna de screening est s’impittu de su Metaverso. Su progettu, prevedit chi s’assistente sanidaria impittet sa realidade virtuale po attoppare su malaidu in d’unu logu virtuale, recollinde s’anamnesi e dande tottu sas notissias chi serbint po sighire cun sa baludatzione. Custu metodu permittit de minimare sas distantzias e garantire unu cunfrontu pius derettu intre duttore e malaidu, rendinde s’assistentzia sanidaria pius atzessibbile e balida.

S’impittu de su Metaverso in su campu de sa meighina preventiva est unu passu in daenanti importante meda, pro itte permittit de dare accottu sanidariu personalizzadu chentza chi unu si deppat ispostare. In d’unu ogu comente cussu de sas presones, inube sas visitas ispecialisticas podent resurtare pius diffitziles de organizare, custa tennologia divenit unu mesu de fundamentu po garantire su dirittu a sa salude a tottu sos tzittadinos, cale si siat sa cundissione insoro.

S’esperientzia de Mamone, dimustrat comente sas tennologias novas potant essere impittadas po binchere impedimentos e faghere divennere s’assistentzia sanidaria pius atzessibbile. Su progettu screening po su bugnu a su “colon retto”, gratzias a sa cumbinada intre prevensione connotta e realtade virtuale, diat podere divennere unu modellu chi si podet faghere fintzas in atteros logos diffitziles, comente ispidales chi sunt attesu o comunidades isoladas.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22