Una task force de s’Europa po accomettare sa chistione de s’isula in sas carraduras: sa probosta italiana.

Sa netzessidade de un’interventu istrutturadu po accomettare sos problemas ligados a sa cundissione de sas isulas in su sistema de sas carraduras europeas bessit a pizu cun fortza meda dae sas conclusiones de s’iscruccullu chi serbit po connoschere sa continuidade de s’iscrocca.

S’idea tzentrale est de creare una task force de sas organissasiones chi accorret delegados de su Parlamentu Europeu, de sa Commissione, de su Comitadu de sas Regiones e de su Comitadu accolomicu e sotziale. S’intentu est cussu de cordinare in manera ecchilibrada sas politicas europeas po sa carradura, garantinde un’attentzione pius manna a sas isulas.

Secundu su testu finale, approadu cun d’una majoria manna e solu s’astennida de sos Chimbe Isteddas, s’Italia tiat teppere torrare a biere sos trattados suos cun s’Unione Europea po cambiare su regolamentu de sa cuncurrentzia e de sos azzudos de istadu. Custu cambiu de derettura tiat permittere de introduire a livellu natzionale mesuras po rendere pius balidu su sistema de sas carraduras, mezzorande sos collegamentos intre sas isulas, sos logos foranos e su restu de su paisu.

S’intentu tiat essere cussu de creare unu meccanismu automaticu de accottu, chi non dimandet donzi borta su controllu de sa Cummissione Europea. Si tiat trattare de binchere su sistema de oe de sos pesos de servitziu pubbricu, zuigadu mancante po sulenare sas esigentzias reales de continuidade de s’iscrocca.

S’iscruccullu evidentziat puru sa netzessidade de affortigare su Fundu Naztionale po su cuntrastu de sos impedimentos chi bi sunt pro more de s’insularidade e de accolumare su disvariu infrastrutturale intre sos divressos logos geograficos de su Paisu. Un’attentzione particulare a sa garantzia de unu sistema de collegamentos aereos chi siat cumpridu e balidu dae e po sa Sicilia e sa Sardigna, creschinde sos medios disponibbiles.

S’approbada de custu testu est unu primu passu importante meda assa parte de una politica chi siat pius attenta a sas particularidades de sa Natzione nostra. Addulgare sos dannos ligados a s’insularidade non est solu una chistione
de zustissia, ma fintzas un’elementu de fundamentu po garantire unione sotziale e isviluppu de s’accolomia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Dinamo Sassari derretta dae Reggio Emilia, divenit prus diffitzile arribare intre sas primas.

Amargura pro sa Dinamo Sassari chi perdet contra su Reggio Emilia pustis de una partida chi pariat sutta de controllu. S’isquadra tattaresa est bistada in daenantis in sos puntos casi po tottu sa partida e a unu tzertu puntu at tentu fintzas unu vantazu mannu. In sos urtimos minudos peroe sos istranzos sunt resessidos a passare in daenantis e binchere.

Sa derretta pesat mescamente pro sa classifica. Si sa Dinamo epperet binchidu diat aere fattu unu passu importante meda pro si accostare a sas primas isquadras de su campionadu. Invetzes cun custu risurtadu sa carrela divenit prus cumplicada e sa distanztia dae sas primas de sa classifica creschet. Pro bona parte de sa partida s’isquadra de Tattari at giogadu bene. At acciappidu canisteddos cun fatzilidade e est resessida a fraigare unu vantaggiu bonu. Su pubbricu de su PalaSerradimigni at agguantadu s’isquadra isperande in d’unu sutzessu chi podiat battire cunfiantza pro sa fine de s’istajone.

In sos urtimos minutos peroe, sa situassione est cambiada. Reggio Emiliaat incumintzadu e recuberare puntu subra puntu mentres sa Dinamo at perdidu unu pagu de siguresa. Carchi assione no est andata bene e sos istranzos nde ant approfittadu pro si accostare semper de prus in sos puntos fintzas a binchere sos tattaresos in su finale.

Intre sos giogadores de sa Dinamo unu de sos menzus est bistadu Desure Buie chi at sinzadu puntos meda e d’est bistadu pro parizzu tempus su puntu de relata de s’isquadra in attaccu. Cando peroe est bistadu cambiadu pro si pasare un’appena su giogu de sa Dinamo at abbaccadu e s’isquadra at tentu problemas a acciappare solutziones novas. Una cosa positiva est arribada dae sa torrada in campu de Marshall pustis meda tempus de assentzia pro problemas fisigos. Su giogadore at incumintzadu bene sa partida sinzande duos tiros importantes dae attesu.

Dae s’attera parte Reggio Emilia at sighidu a bi creere fintzas a sa fine. Carchi giogadore suo at acciappidu canisteddos importantes in sos mamentos detzisivos e s’isquadra est resessida a binchere una partida chi pariat giai perdida. Pro sa Dinamo addurat duncas delusione meda. Pro meda tempus s’isquadra aiat mustradu de podere binchere ma in sos urtimos minutos est cambiadu tottu. Est una de cussas partidas chi dassant delusione pro itte su sutzessu fuit deabberu accanta.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22