Est bistadu fissadu s’incarrigu po s’autopsia de Natalie Tanda, sa pizzinna de otto annos morta sapadu sero in s’Ispidale Tzivile de s’Alighera, in trischias chi ant ispertadu commossione e iscuntzertu mannos meda.

S’autopsia l’ant a faghere su 19 de frearzu in s’Ispidale de Meighina Legale de Tattari.

S’incarrigu de s’autopsia a unu duttore fora de s’Ispidale de Tattari est bistada netzessaria pro itte custa istruttura faghet parte de sa mattessi Asl de s’ispidale de s’Alighera, inue sa pizzinna fit cuberrada. Sa detzisione de sos zuighes punnat a garantire sa trasparentzia pius manna po cumprendere sos motivos de sa morte, chi at dassadu ispora tottu sa comunidade de Biddanoa Monteleone, bidda de origine de sa pizzinna.

In su mentres, sa procura at disponnidu su secuestru de sa cartella clinica de sa pizzinna, unu passu importante meda po cumprendere sas urtimas dies de sa vida sua e cumprendere si bi siant bistadas trascuradesas o cumplicassiones pustis de s’operassione e cosas chi non sunt bistadas fattas bene. Natalie, duas dies prima fit bistada operada po li che bogare sos tuleddos in sa parte de otorinolaringoiatria de s’ispidale de s’Alighera.

Sa famiglia de sa pizzinna, chi est ancora abbolottada po custa disgrassia, at dezisu de nomenare unu consulente meigu-legale suo, po partetzipare a s’autopsia. Sos abocados chi ant nomenadu su babbu e sa mama de sa pizzinna, ant nadu chi s’obiettivu est cussu de faghere lughe prena supra su chi est suzzessu e cumprendere ite potat essere suzzessu in sas oras pustis de s’operassione.

Tottu sa comunidade de Biddanoa Monteleone est in dolu po s’improvvisa disparida de Natalie, chi benit ammentada commente una pizzinna solare e prena de vida. Paritzos nuntzos de cordozu sunt arrivados a sa famiglia, mentres sos amigos e sos connoschentes s’istringhent a sa famiglia in custu momentu de dolu.

In sas dies imbenientes si isettant sos risurtados de s’autopsia, chi tiant podere offerrere rispostas detzisivas supra itte eppat causadu custa fine fea. Sa zustissia at a baludare si bi sunt curpas e, si est netzessariu, at a faghere atteros atzertamentos po garantire zustissia a sa pitticca Natalie.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Su bistire de sos Mamutzones: identidade e misteriu de sa Barbàgia

Su bistire de sos Mamutzones est unu de sos sìmbulos prus antigos e reconnoschìbiles de sa Sardigna de su connottu, unu bistire chi arregat seculos de istòria, ritos e signifficu. Ligadu a su carrasegare de Mamujada, in su coro de sa Barbàgia, est una de sas espressiones prus cadrias e misteriosas de sa cultura sarda.

Su bistire est fattu de pedde de berbeghe niedda, caratza de linna iscura e sonàzzos ghettados in sas palas. D’onzi elementu tenet unu balore simbòlicu pretzisu: sa pedde ammentat su ligàmene cun sa natura e su mundu pastorale, sa caratza mustrat sa cara àrcaica de s’òmine chi si trasformat in ispìritu, mentres chi sos sonàzzos batent, cun su ritmu fundudu insoro, una boghe antiga chi sonat in sos carruzzos de sa bidda.

Su pesu de su costumene podet passare sos 30 kilos, pro neghe de sos sonàzzos mannos de brunzu fìssados in d’una istrutura de coriu. Si lu pònnere recherret fortza fisica, ma fintzas cuntzentratzione e rispetu pro su connottu. Su movimentu de sos Mamutzones est lentu e cadentzadu, acumpanzadu dae sos Issohadores, friguras bestidas de biancu e ruju chi los ghìant e los inghìriant in sa protzessione.

S’orìgine de custa mascara est cuada dae su misteriu. Carchi istudiosu dda ligat a ritos de fertilitade o de passàgiu intre sas istajones, àteros a tzerimònias de amparu e purificatzione. In donzi casu, su bistire de sos Mamutzones sighit a rapresentare una forma de memòria coletiva, unu connottu bivu chi aunid sa comunidade e affaschinat bisitadores dae totu su mundu.

Oe su bistire est custòidu e tramandadu cun orgòlliu, sìmbulu de identidade, resistèntzia e apartenèntzia. Si lu pònnere no est unu gestu folclorìsticu simple, ma un’atu de continuitade cun su tempus coladu, una manera pro ammentare chi sa Sardigna prus autèntica bivet ancora, in su sonu de sos sonàzzos e in su passu lentu de sos Mamutzones in soro.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”