“Casteddu, Bittoria de Coro e Talentu: Parma iscuttu 2-1 in sa cursa po sa salvesa”.

Su Casteddu torrat a acciappare s’arrisu e tzentrat una bittoria importante meda in sa cursa po sa salvesa, binchinde su Parma po 2-1 in d’una partida chi tiat podere sinzare una bortada po ambas sas isquadras. Sos Ruju e blu, chi arribaiant dae duas partidas perdidas conchistant tres puntos de oro chi lis cunsentini de si ponnere a +4 dae su logu de sa masqada, occupada propriu dae su Parma. Sa bittoria est commente un’alenu de ossigenu po sos sardos, chi ant mustradu carattere in d’una porfia giogada cun intensidade.

Sa partida si est abberta cun d’unu primu tempus bilantzadu ma riccu de emossiones. Ambas sas isquadras , scientes de s’importantzia de su chi bi fit in palu, si sunt accomettadas a bisu abbertu. Su Parma at proadu lestru a essere periculosu, cun Camara chi at iffrisadu su vantaggiu. Puru Bonny est andadu accanta a su goal cun d’unu tiru chi est finudu a banda de pagu.

Su Casteddu, peroe, no est adduradu a abbaidare e at respundidu cun d’una aera malarrimada. Mancari sas occasiones, su primu tempus est concruidu chentza chi nisciunu eppat sinzadu, dassande pensare a unu secundu tempus carrigu de tesone. In su secundu tempus, su Casteddu est resessidu a leare sa partida in manu e at acciappadu su vantaggiu, unu fattu isfortunadu po su Parma: unu autogoal de Vogliacco, chi in su mentres chi fit tentande de che imbolare a fora unu cross, che at mandadu sa bozza in sa porta sua.

S’autogoal at affortigadu sos ruju e blu, chi ant incumintzadu a ispinghere cun cunbintzione pius manna po chircare s’addoppiadura e serrare sa partida. Su momentu detzisivu est arrivadu cando su tennicu de su Casteddu at dezisu de faghere bintrare in campu Florinel Coman.

Su zovanu rumenu, appena comporadu dae sos sardos, non bi at postu meda a dassare su sinzu: cun d’una giogada ispettaculare, at iscarrigadu unu tiru potente e pretzisu meda chi est bintradu in palas de su portieri de su Parma. Est su primu goal suo in Italia, unu tiru chi at fattu iscoppiare s’allegria de sos tiffosos in sa Unipol Domus e at regaladu a su Casteddu su vantaggiu doppiu.

Su Parma, peroe, non si est arresu e at chircadu de torrare a abberrere sa partida. Leoni at acciappadu su goal chi at accurtziadu sas distanzias. In sos minutos finales, intames, s’isquadra istranza no est resessida a creare atteras occasiones: sa defensa de su Casteddu si est serrada cun ordine, craccande donzi tentativu de sos de su Parma e diffendinde su risurtadu fintzas a sa fine de sa partida.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Nora, sa tzittade supra de su mare chi contat sas issidas de sa Sardigna.

Intre sos logos archeologicos prus ammaghiantes de s’isula,sa zura archeologica de Nora est una de sas testimonias prus importantes de s’istoria antiga de sa Sardigna. Posta in sa costa sud-occidentale , in s’iscrocca de Pula, Nora est unu logu inube su tempus passadu ispuntat a pagos passos dae su mare, intre ruinas chi contant seculos de tzivilidade e barattos in su Mediterraneu.

Fundada cun meda probabilidade dae sos Fenicios intre su IX e s’VIII seculu A.C.,Nora est cussiderada una de sas tzittades prus antigas de s’isula. Pustis est divennida unu tzentru punicu importante meda e, prus a tardu,romanu, leande unu rolu istrategicu dae su puntu de bista de sos negossios chi de s’amministrassione. Sa posissione sua,supra de una penisula accarada supra su mare, l’at fatta divennere unu portu naturale e unu puntu de collegamentu de fundamentu intre sa Sardigna e sos atteros caminos de su Mediterraneu.

Passizzande intre sos restos de sa tzittade si podent biere in manera crara sas fases istoricas divressas chi sunt furriadas in su tempus.Intre sos elementos prus de ammaghiu bi est su teatru romanu, una de sas conas de su situ, chi fintzas oe benit impittadu in su mentres de s’istiu pro abbenimentos culturales e ispettaculos. Accanta a su teatru bi sunt sos istabilimentos termales, cun logos dedicados a su relax e sa vida sotziale, e parizzas domos decoradas cun musaigos chi testimonzant su livellu de isviluppu apperricadu dae sa tzittade in su tempus de sos romanos.

Sos caminos sticcados,sos restos de sas cresias e sas istrutturas de su portu contant de una tzittade biva e ordiminzada, inube si intrintzaiant attividades de barattu,religiosas e de donzi die.Interessante meda est su cuartieri punicu, chi custoid sas andalas de sa fase prus antiga de su logu. Unu de sos trattos pius ammaghiantes de Nora est s’appitzicu suo cun su mare. Parte de sa tzittade antiga s’isterriat in sa costa e oe carchi istruttura si agattat sutta de su livellu de s’abba, e si biet solu in carchi occasione.

Custu elementu dat unu contribbudu a faghere divennere su situ unigu, inube archeologia e bista naturale si fundent in d’unu ecchilibriu ammaghiante.Sos iscavos, chi sunt ancora faghinde, sighint a torrare materiales e informatziones novas, arricchinde sa connoschentzia de unu logu chi no at ancora iscoviadu sos segretos suos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22