Sa Corte de Assise de Tattari at bogadu a fora sa sententzia: 24 annos de galera po Alberto Picci, riconnoschidu fartadu de mortoriu de su babbu, Zuseppe Picci.

S’accadessimentu est de su 27 de Aprile 2022, cando, a s’arbeschida, in sa domo insoro de Santa Maria Coghinas, Alberto si est arraffiladu contra de su babbu in su mentres chi fit dromminde, corpandelu cun d’una fruschina e unu burteddu. Mancari sos isfortzos disisperados de sos duttores, s’omine est mortu otto meses a pustis pro more de sas cumplicantzias e sas fertas graves meda chi aiat tentu.

Sa sententzia est bistada ispriccada su 4 de frearzu dae sa Corte cun su Presidente ,su zuighe Massimo Zaniboni. Sa pena chi li ant dadu, est cussa dimandada dae su pm, chi aiat cramadu una cundenna tipu, fintzas cunsiderande sos cabidianos de s’accusadu. Alberto Picci, difattis, fit bistadu giai cundennadu a 12 annos de galera, pena divennida deffinitiva, po aere tentadu de bocchire su babbu e sa mama in su 2022.

Secundu cantu fit bessidu a pizu in su dibattimentu, Alberto tiat aere fattu tottu custu po “aere tentu in piccu”, comente issu mattessi aiat nadu cando fit bistadu preguntadu. S’accusadu, chi s’abogadu suo at contadu comente unu chi tenet problemas mannos a conca, at corpadu su babbu cun d’una fruschina chi li at trapassdu sa ula, ficchindesi pustis in conca.

Pustis at usadu un’urteddu po lu sighire a istroppiare, fintzas cun d’una orrorosa praga a sa ucca. Fintzas sa mama est bistada corpada in s’attaccu: ferta medas bortas a conca cun d’unu burteddu “multiuso”, est resessida a iscampare. Su babbu, Zuseppe, a s’incumintzu est bistadu tentu in vida gratzias a operassiones e interventos de sos duttores, at passadu otto meses in cunditziones disisperadas. Sas iscanniduras graves meda po more de sa fruschina, chi daiant problemas po alenare e po s’ingurtidura, li ant fattu arrivare medas infetziones. Su motivu de sa morte est bistada una prummonite, chi at tentu propriu po more de sas fertas chi non sanaiant.

In tottu, Alberto Picci at a tepere iscontare 24 annos de galera po su crimene chi at cummessu contra su babbu. In pius, est bistada cunfirmada una cundenna a un’atteru annu e battoro meses po su tentadu mortoriu de sa mama, faghinde arrivare sa pena in tottu a 25 annos e battoro meses de galera.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Elettrocavu Luvula-Garteddi, sighint sos tribaglios de Terna: imbestimentu de 50 miliones po mezorare sa retza elettrica.

Sighint sos tribaglios de Terna po fraigare su Elettrocavu novu cun cavu sutta de terra longu 19 kilometros chi at a collegare sas cabinas primarzas de Luvula e Garteddi. S’opera faghet parte de sos interventos po affortigare sa retza elettrica locale e at a permittere de la faghet divennere prus balente e sigura. Pro faghere sos tribaglios, sa sotziedade at imbestidu casi 50 miliones de euros. Su collegamentu novu at a dare sustentamentu elettricu in prus a sa cabina primarza de Garteddi chi oe est collegada a sa retza elettrica natzionale po mesu de unu solu elettrocavu.

Pro cantu pertoccat sos tribaglios, los sunt faghinde in sa carrela provintziale 25 e sos cantieris de su lotto 1 e 2 in su trettu chi andat dae su’iscansada de Luvula fintzas a Garteddi. Sos tribaglios sunt andande a daenantis segundu su programma chi si prevediat. Una prima parte at essere finida intro lampadas 2026 mentres
sa fine de sos tribaglios si prevedit intre sa prima metade de su 2027. In su mentres de sos tribaglios po garantire sa siguresa est bistadu netzessariu istringhere sa carrela faghinde passare sas macchinas cun su traffigu regoladu dae unu semafforu.

A sa congruida de sos tribaglios sa sotziedade at a torrare a faghere s’isfaltu in tottu su trettu de sa carrela interessada dae su cantieri. S’abberu de s’opera est bistada deffinida po mesu de unu caminu de cunfrontu cun sas amministratziones locales. In sos primos mamentos su trassadu de su cavu interradu est bistadu istudiadu imparis cun sos entes interessados cun s’intentu de minimare cantu prus est possibile problemas po s’iscrocca e s’ambiente e rispettare sas esigentzias de sas attividades de sa laurantza. S’elletrocavu novu at a passare mescamente accanta a atteras operas chi giai esistint comente carrelas istatales e provintziales minimande sas intromissiones cun sas zuras de majore balore naduralisticu e de bista de sa zura.

Custu interventu est unu passu importante po affortigare sa retza elettrica de s’iscrocca cun beneffissios isettados po sa continuidade de su servitziu e prus siguresa in su faghere arribare prus energia po sas comunidades locales.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22