Femina aggurteddada in Tattari: s’affraccadore presumidu est su tiu de su maridu.

Sa femina, una de chimbanta annos, est bistada corfida a s’ischina, su prumone e a sos renes. S’omine de 55 annos, est bistadu arrestadu pagu tempus pustis de su tentadu mortoriu de sa femina. Una disgrassia si est cossumada a manzanu tardu in Tattari, in d’una domo in sa carrela Cabu d’Ispiga, in sa zura arta de su trichinzu Monte Rosello.

Un femina de casi 50 annos est bistada aggurteddada in manera isferizada, retzinde isticchidas graves meda chi ant dimandadu un’interventu de sos duttores lestru meda in s’ispidale Santissima Annunziata de Tattari. Secundu sas primas novas bessidas a pizzu dae sas iscruccullas de s’Isquadra Mobile de sa Politzia de Tattari, cun su dirigente Michele Mecca, s’affraccadore tiada podere essere un’omine de 55 annos, tiu de su maridu de sa femina.

S’omine est bistadu arrestadu in pagos minutos pustis de s’accadessimentu gratzias a s’interventu lestru meda de sa politzia.

Sa femina est bistada corfida parizzas bortas cun d’unu burteddu de coghina chi teniat un’atza longa e acuta. Sas isticchidas sunt bistadas meda graves: sa femina est bistada isticchida prima a s’ischina, pustis a unu prummone e infinis a unu rene, chi est bistadu pertusu dae s’atza. Pustis de s’attaccu, sa femina est resessida a si cuare in d’una istantzia de sa domo, teninde unu momentu de assulenu solu cando si est abizzada chi s’affraccadore si che fit andadu.

Mancari intenderet dolore e su periculu chi s’omine torrerat, at acciappidu sa fortza de dimandare azzudu a una bighina de domo. Custa at giammadu sos succursos e sa politzia in presse meda, permittinde un’interventu lestru.

In sa domo sunt arrivados sos de sa politzia e un’ambulantzia de su 118. Sa femina est bistada leada in presse meda a s’ispidale Santissima Annunziata in coditze ruju, inue l’ant operada in presse meda po li salvare sa vida. Sa femina est sempre grave, ma sos duttores sunt faghinde su chi est possibile po la salvare.

In su mentres, sa politzia si est posta a chircare s’omine, e l’at agattadu in sa mattessi zura pagos minutos pustis de s’affraccada. S’omine est bistadu frimmadu e che lu ant giuttu in Questura po li faghere sas dimandas. Incuddane sunt arrivados fintzas sos de s’iscentifica po faghere sos cabbales e regollere proas chi potant servire a faghere cumprendere comente tottu custu est sutzessu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sartiglia 2026 : connottu, caddos e contierras supra sa siguresa.

Sa Sartiglia de Aristanis torrat a colorare sas carrelas de sa tzittade cun sa sua ispettaculare cursa medievale cun sos caddos, unu de sos abbenimentos  prus ammaghiantes de su Carrasegare sardu. Setzidores caratzados a caddu si disaffiant in sa cursa a s’istedda e in sas parizas, mustrande abilidade e corazzu e muttinde appassionados de folklore e turistas dae tottu s’isula e dae fora. S’ispettaculu, cun raighinas de seculos, mustrat s’identidade culturale aristanesa, ma s’edissione de cust’annu est accumpanzada dae dibattas e contierras ligadas a sa siguresa.

Sas dispostas novas prenettant affianzos comente cascos e gorpettes po sos setzidores, ma sos ordiminzadores narant chi custos obbrigos arriscant de cumpromittere sa parte de su connottu e bisiva de sa Sartiglia, intre costumenes istoricos e caratzas tipicas.

S’amministratzione comunale at avantzadu interpretatziones chi diant permittire de faghere s’abbenimentu chentza revertire sas leghias antigas, mentres sa chistione est bistada discutida fintzas a livellu istitutzionale pro accrarare sas regulas. Sa cosa addurat cristallitzada, cun cussos chi sustentant su connottu chi dimandant de mantennere frimma s’identidade de sa manifestassione e cussos chi sunt interessados a tutelare sos setzidores e sos animales.

Sos Gremios istoricos, assotzios chi mustrant sos Gremios ligados a sa Sartiglia, ant ghettadu appellos po diffendere sa manifestassione in sa forma sua originale. Mancari sas tesones, sos ammanizos andant a daenanti intre proas, bestiduras e costumenes, dae sa frigura de Eleonora de Arborea fintzas a sos isseperos de sas parizas. Sa tzittade bivit unu fermentu chi aunit braga e murighinzu, mentres sa comunidade chircat de abbilantzare rispettu po su conntottu e attentzione a sas regulas novas de siguresa.

Sa Sartiglia addurat gai una frigura de istoria, comunidade e floklore, e sas contierras de cust’annu reflettint s’isfida chidrina de cunciliare su rispettu de su connottu antigu cun sas esigentzias de sa siguresa moderna. Abbenimentos comente sa Sartiglia non sunt solu ispettaculos, ma beros e proprios istrumentos de memoria de tottus e identidade culturale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22