Turismu: s’Alighera si cunfirmat sa tzittade pius visitada de sa Sardigna in su 2024.

In su 2024, s’Alighera at cunfirmadu su rolu suo de logu reina de su turismu in Sardigna, diventande sa tzittade pius visitada de s’Isula. Custu risurtadu lu cunfirmat su report”Sardigna Hos Trend Viaggi” fattu dae Eager Analytics, po mesu de s’app turistica Heart of Sardinia. Sa tzittade catalana sighit a essere unu de sos logos pius appretziados gratzias a su riccu patrimoniu istoricu, a sas plajas de sognu e a s’ ispipilla offerta culturale chi faghet arrivare bisitadores italianos e internatzionales.

No est peroe solu s’Alighera, a registrare numeros chi dant corazu. Su secundu logu in sa classifica de sos logos turistricos pius bisitados est Casteddu, su tzentru pintzipale de sa Regione, cun sa cumbinada sua de istoria millenaria, cosa de pappare de calidade e una situatzione moderna e chi est in movimentu. Terranoa, chi serrat su cataffale, addurat unu puntu importante po su turismu sardu gratzias a su trettu de sa Costa Ismeralda e a su mezzoramentu de sos collegamentos cun su restu de s’italia e su forastigu.

Fintzas localidades comente Durgale, Arzachena e Santu Diadoru sunt affortigande su rolu insoro comente logos turisticos de importantzia.

S’accreschimentu de custas zuras est unu signale craru chi su turismu sardu si est isparghinde in manera pius funguda, interessande no solu sas destinatziones pius connoschidas, ma fintzas sas zuras pius pagu connoschidas chi apparant esperientzias beras ligadas a sa natura, a su connottu e sas cosas de mandigare e buffare de sos logos.

Unu casu interessanta meda est cussu de Tattari, chi at bidu unu accreschimentu mannu de bisitadores in cunfrontu a sos annos passados. Sa tzittade est puntande supra un’offerta turistica nova chi baloritzet su tzentru istoricu suo, sos abbenimentos culturales e s’iscrocca a inghiriu, diventande unu logu semper pius appretziadu.

Unu contribbudu de signifficu a su sutzessu turisticu de sa Sardigna in su 2024 est arrivadu dae sas festas de s’jerru, in manera particulare in su tempus de Cabudanne. Terranoa si est distinta comente sa destinatzione pius bisitada po Santu Silvestru, gratzias fintzas a sos abbenimentos musicales e a sos cuncertos chi ant attiradu pubbricu meda. Sighint Casteddu Sardu e s’Alighera, chi si cunfirmant sos logos favoressidos po chi seperat de passare s’incumintzu de s’annu novu in s’Isula.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

“Su Nenniri”, s’antigu connottu sardu chi abbisat sa Pasca.

Cun s’arribu de sa Pasca, in biddas meda de sa Sardigna torrat unu de sos connottos prus antigos e ammaghiantes de s’isula:”su Nenniri”. Si tratta de chimizones de ranu o atteros semenes creschidos a s’iscuru, chi affigurant sa torrada a bida e s’isperantzia, ligados a sos ritos de sa Chida Santa. S’ammanitzu incuminzat parizzas dies prima de Pasca, sos semenes benint postos a brotare in bottos pitticcos, a s’ispissu prattos o canisteddos,cuzigados e attesu dae sa lughe. In custa manera creschent fines,craros e delicados, leande unu colore giallu chisinathu tipicu meda.

Sa forma insoro chidrina e s’aera casi de “sufferentzia” crischiant comente iscromba su sacriffitziu e sa morte de Cristus. In su mentres de sa Chida Santa,”is nenniris” che benint leados in cresia e impittados pro adornare sas tumbas, sos artares pro su Giovia Santu. In carchi bidda benint postos cun contivizu particulare impare a frores,qandelas e pannos, creande bistas simples ma prenas de signifficu.Est unu zestu chi aunit fede e connottu populare, chi andat dae ingendra a ingendra.

In comunidades meda, mescamente in sas biddas prus pitticcas, s’ammaniada de sos nenniri est fintzas unu mamentu de cundivisione.A s’ispissu sunt sas feminas e sos bezzos a si nde occupare, impare cun zovanos, chi gai imparant su balore de custos ritos antigos. Custu connottu tenet raighinas attesu meda, mancari ligadas fintzas a ritos de sa laurantza prima de Cristu, chi tzelebraiant su cursu de sa natura e sa torrada a bida pustis de s’jerru.Cun su tempus, custos signifficos si sunt intritzados cun sa religione cristiana, dande vida a una cosa chi oe mustrat impare morte e torrada a bida.

“Su nenniri” non est solu unu elementu de decoradura, ma unu signu fungudu de sa cultura sarda. In d’unu mundu chi cambiat a sa lestra, custos connottos sighint a bivere gratzias a sa memoria de sas comunidades e a su disizu de no perdere sas raighinas insoro.Cun sa Pasca chi est accanta, cussos chimizones divennint gai unu nuntzu simple ma forte:pustis de donzi tempus buggiu, sa vida agatta semper sa manera de torrare a naschere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22