Su casu de sa morte de una femina chi at abbolottadu Casteddu e tottu sa Sardigna intrea s’annu passadu, s’incarrelat a una fase nova de su zudissiu.

Igor Sollai, 43 annos, chi po como est intro de sa presone de Uta, si est preparande po accomettare luego su zudissiu po aere mortu sa muzzere, Francesca Deidda, de 42 annos. S’omine at cunfessadu su delittu, chi est bistadu fattu in sa domo insoro in Santu Sperau in su mese de Maju 2024, ammittinde puru de aere cuadu su corpus.

Cun su depositu de sos urtimos risurtados fattos dae sa Procura de Casteddu, in mesu de sos cales bi est sa resessia de sa lotomia, sunt finidas sas crompiduras de ammaniada. S’esamene de su corpus at cunfirmadu sa violentzia isferitzada de su delittu: Francesca est bistada fartada a su nessi otto bortas cun d’unu marteddu, chircande a sa disisperada de si diffendere, ma chentza bi resessire a si che fuire dae sa furia de su maridu.

Su corpus de de sa femina est bistadu acciappidu solu pustis de duos meses, su 18 de triulas, serradu intro de una bussa manna disamparadu in sas campagnas in mesu de Sinnai e Santu Idu, accanta a s’istatale bezza 125. Un’accattu chi at battidu atteru dolore a custa disgratzia, abbolottande sos de famiglia e sos amigos giai afferiados dae s’isettu longu.

Sollai at cunfessadu de aere mortu sa muzzere in su mentres chi lu fit preguntande in sa presone de Uta su pubbricu ministeriu Marco Cocco, su 22 de su mese de sant’Andria passadu.

Intamene, addurat azzesa sa dibatta supra su motivu de su delittu. Sa deffensa escluidit chi siat bistadu fattu a belle posta, nande chi tottu est sutzessu in d’unu momentu de arrenegu. S’accusa, invetzes, narat chi su mortoriu siat bistadu fattu pro itte su maridu cheriat balanzare dinari ca sa muzzere teniat un’assigurazione supra sa vida sua. Cun s’isserru de sas scruccullas chi si faghent a s’incumintzu, s’isettat in pagu tempus sa torradura de su corpus a sos familiares, chi ant in pagu tempus podere faghere s’interru de Francesca.

Sa comunidade de Santu Sperau, chi est galu attrippada, si est preparande a onorare sa memoria de sa femina. S’indolimentu po sa perdida si ammisturat a s’arrenegu po sa violentzia patida, atzendinde un’attera borta sa dibatta supra su bisonzu de diffendere sas feminas dae istinnas e violentzias intro de sas domos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Emergentzia in s’ispidale Brotzu: setziones antrecoro e malaidos in sos passaditzos.

S’ispidale Brotzu de Casteddu, unu de sos logos sanidarios pius importantes de sa Sardigna, si acciappat in d’una situatzione de criticidade urtima. Sas setziones sunt prenas e sos numeros non dassant logu a interpretatziones: s’istruttura est pius che carriga, e su personale sanidariu est custrintu a assentare sos malaidos supra sas letticas in sos passaditzos, oppuru in angulos de fortuna in daesegus de divisores, isettande chi si liberet unu postu de lettu. Iscenas chi si bient semper de pius e chi contant de una realidade chi est divennida de donzi die, fatta de urgentzias chi no si podent guvernare, carentzias cronigas e logos mancantes.

Su fenomenu no est novu, ma si est aggravadu in sos urtimos annos puru po more de su reduimentu de s’offerta sanidaria in s’iscrocca pius attesu. Sas segadas, sas reddadas de sas setziones, sa mancantzia de personale e de istrutturas chi si pottant acchidare ant permittidu chi semper pius casos siant centralizzados in sos ispidales mannos, comente su Brotzu. E a nde faghere sas ispesas sunt no solu sos malaidos, ma puru sos duttores e sos infermieris, semper de pius sutta de pressione.

Sa crisi de sos ispidales foranos, difattis, ets unu de sos nodos tzentrales de su problema. Istrutturas comente cussas de Isilil, Muravera o Carbonia no resessint pius a garantire servitzios agualantes. In carchi ispidale su personale est reduidu a su minimu. In daenanti de custu iscenariu, no si podet evitare chi sos malaidos finant in sos ispidadels de Casteddu, ingendrande un’effettu imbudu chi su sistema no resessit a agguantare.

A peorare sa situatzione, in custas chidas, si azzunghet s’emergentzia ligada a su cardu urtimu. Sas undas de calore faghent accreschere meda sos fianzos, mescamente intre sas pessonas bezzas e chidrinas, chi sunt giai pius esponnidas a s’intendere male. Su resurtadu est una pressione semper pius arta supra sos Lestros Succursos e sas setziones de sos ispidales, cun tempos de isettu longos meda e caminos de assistentzia chi divenint unu calvariu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22