Su casu de sa morte de una femina chi at abbolottadu Casteddu e tottu sa Sardigna intrea s’annu passadu, s’incarrelat a una fase nova de su zudissiu.

Igor Sollai, 43 annos, chi po como est intro de sa presone de Uta, si est preparande po accomettare luego su zudissiu po aere mortu sa muzzere, Francesca Deidda, de 42 annos. S’omine at cunfessadu su delittu, chi est bistadu fattu in sa domo insoro in Santu Sperau in su mese de Maju 2024, ammittinde puru de aere cuadu su corpus.

Cun su depositu de sos urtimos risurtados fattos dae sa Procura de Casteddu, in mesu de sos cales bi est sa resessia de sa lotomia, sunt finidas sas crompiduras de ammaniada. S’esamene de su corpus at cunfirmadu sa violentzia isferitzada de su delittu: Francesca est bistada fartada a su nessi otto bortas cun d’unu marteddu, chircande a sa disisperada de si diffendere, ma chentza bi resessire a si che fuire dae sa furia de su maridu.

Su corpus de de sa femina est bistadu acciappidu solu pustis de duos meses, su 18 de triulas, serradu intro de una bussa manna disamparadu in sas campagnas in mesu de Sinnai e Santu Idu, accanta a s’istatale bezza 125. Un’accattu chi at battidu atteru dolore a custa disgratzia, abbolottande sos de famiglia e sos amigos giai afferiados dae s’isettu longu.

Sollai at cunfessadu de aere mortu sa muzzere in su mentres chi lu fit preguntande in sa presone de Uta su pubbricu ministeriu Marco Cocco, su 22 de su mese de sant’Andria passadu.

Intamene, addurat azzesa sa dibatta supra su motivu de su delittu. Sa deffensa escluidit chi siat bistadu fattu a belle posta, nande chi tottu est sutzessu in d’unu momentu de arrenegu. S’accusa, invetzes, narat chi su mortoriu siat bistadu fattu pro itte su maridu cheriat balanzare dinari ca sa muzzere teniat un’assigurazione supra sa vida sua. Cun s’isserru de sas scruccullas chi si faghent a s’incumintzu, s’isettat in pagu tempus sa torradura de su corpus a sos familiares, chi ant in pagu tempus podere faghere s’interru de Francesca.

Sa comunidade de Santu Sperau, chi est galu attrippada, si est preparande a onorare sa memoria de sa femina. S’indolimentu po sa perdida si ammisturat a s’arrenegu po sa violentzia patida, atzendinde un’attera borta sa dibatta supra su bisonzu de diffendere sas feminas dae istinnas e violentzias intro de sas domos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22