Su casu de sa morte de una femina chi at abbolottadu Casteddu e tottu sa Sardigna intrea s’annu passadu, s’incarrelat a una fase nova de su zudissiu.

Igor Sollai, 43 annos, chi po como est intro de sa presone de Uta, si est preparande po accomettare luego su zudissiu po aere mortu sa muzzere, Francesca Deidda, de 42 annos. S’omine at cunfessadu su delittu, chi est bistadu fattu in sa domo insoro in Santu Sperau in su mese de Maju 2024, ammittinde puru de aere cuadu su corpus.

Cun su depositu de sos urtimos risurtados fattos dae sa Procura de Casteddu, in mesu de sos cales bi est sa resessia de sa lotomia, sunt finidas sas crompiduras de ammaniada. S’esamene de su corpus at cunfirmadu sa violentzia isferitzada de su delittu: Francesca est bistada fartada a su nessi otto bortas cun d’unu marteddu, chircande a sa disisperada de si diffendere, ma chentza bi resessire a si che fuire dae sa furia de su maridu.

Su corpus de de sa femina est bistadu acciappidu solu pustis de duos meses, su 18 de triulas, serradu intro de una bussa manna disamparadu in sas campagnas in mesu de Sinnai e Santu Idu, accanta a s’istatale bezza 125. Un’accattu chi at battidu atteru dolore a custa disgratzia, abbolottande sos de famiglia e sos amigos giai afferiados dae s’isettu longu.

Sollai at cunfessadu de aere mortu sa muzzere in su mentres chi lu fit preguntande in sa presone de Uta su pubbricu ministeriu Marco Cocco, su 22 de su mese de sant’Andria passadu.

Intamene, addurat azzesa sa dibatta supra su motivu de su delittu. Sa deffensa escluidit chi siat bistadu fattu a belle posta, nande chi tottu est sutzessu in d’unu momentu de arrenegu. S’accusa, invetzes, narat chi su mortoriu siat bistadu fattu pro itte su maridu cheriat balanzare dinari ca sa muzzere teniat un’assigurazione supra sa vida sua. Cun s’isserru de sas scruccullas chi si faghent a s’incumintzu, s’isettat in pagu tempus sa torradura de su corpus a sos familiares, chi ant in pagu tempus podere faghere s’interru de Francesca.

Sa comunidade de Santu Sperau, chi est galu attrippada, si est preparande a onorare sa memoria de sa femina. S’indolimentu po sa perdida si ammisturat a s’arrenegu po sa violentzia patida, atzendinde un’attera borta sa dibatta supra su bisonzu de diffendere sas feminas dae istinnas e violentzias intro de sas domos.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Carburantes, prus controllos de sa Finantza po cansare aumentos chena zustificassione.

Pustis de s’aumentu novu de sos pretzios de s’energia, po more de sas gherras in Mediu Oriente, In Italia sunt bistados affortigados sos controllos supra sos carburantes. Sa Finantza at detzisu de affortigare sos controllos supra tottu sa retza de ispartidura de benzina e gasolio fintzas in Sardigna.

S’intentu est de controllare cun attentzione donzi mamentu de su camminu chi che leat su carburante finas a sos ispartidores. In custa manera si cheret evitare chi calincunu si approfittet de sa situassione internatzionale po accreschere sos pretzios in manera chi no est zusta. Sos controllos sunt po tottu sos carburantes e partint dae sas dittas chi important o ispartint benzina e gasolio e arribant fintzas a sos ispartidores. Sa Finantza est controllande documentos, fattura e pretzios po cumprendere sis sos accreschimentos sunt currettos.

In sos urtimos tempos su pretziu de sos carburantes est torradu a pigare po more de sa tesones internatzionales e de sos problemas de su mercadu de s’energia. Cando bi sunt crisis o gherras, difattis, su pretziu de su petroliu podet accreschere in presse meda e custu interessat sos pretzios de benzina e gasolio. Propriu pro custu motivu sas autoridades cherent evitare chi calincunu irfruttet sa situsassione po balanzare prus de su chi est netzessariu. Sos accreschimentos de sos pretzios, difattis, deppent dipendere solu dae s’andamentu de sos mercados internatzionales e non dae cumportamentos iscurrettos.

S’affortigamentu de sos controllos est bistadu detzisu dae su Ministeru de s’Accolomia e de sas Finantzias, chi sighit dae accanta sos pretzios de sos carburantes in Italia. S’intentu printzipale est de diffendere sos tzittadinos e garantire trasparentzia. In d’unu mamentu in su cale su pretziu de s’energia est meda istabbile, est importante controllare chi tottu su sistema funtzionet rispettande sas regulas. Sos controllos de sa Finantza ant a sighire in sas chidas imbenientes in totta Italia. Sos controllos ant a serbire po cumprendere si sos pretzios chi sunt faghinde sos ispartidores sunt beros o si bi sunt cosas chi no andant bene.

S’intentu finale est de garantire chi sos affinadores paghent unu pretziu zustu e chi su mercadu de sos carburantes adduret craru e controlladu, chena ispeculatziones e aumentos non zustifficados.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22