Su tempus benidore de s’istadiu de su Casteddu, disignadu po remendare su bezzu Sant’Elia, si mezzorat po essere pius poderabile, po essere pius in cuntattu cun sa tzittade e su cuarteri.

S’accordu de su progettu modificadu est bistadu firmadu in Villa Devoto dae sa presidente de sa Regione Sardigna, Alessandra Todde, e dae su sindicu de Casteddu, Massimo Zedda, e mustrat una bortada de signifficu po su progettu, cumpletande s’impiantu isportivu novu in d’unu cuntestu pius mannu e rispettosu de s’ambiente e de sas esigentzias de sa tzittade.

Su coro de su progettu addurat s’Istadiu novu, ma su chi cambiat est sa bista chi lu arrodat. Non bi ant essere volumenes in pius po domos o po su negossiu. Imbetzes, su logu at essere arricchidu dae unu logu birde mannu meda, cun su Parcu de sos Aneddos chi at arrodare s’impiantu.

Sa Domus, s’Istadiu chi bi est como, at essere impittadu comente campu de giogu po sas categorias isportivas pius in bassu e atteros impiantos ant essere destinados a s’isport po sos pizzinnos e piccioccos.

Custa proposta serbit a cusire su cuarteri de sant’Elia cun sa tzittade, gratzias fintzas a su rennobamentu de sos palattos de sas domos populares e a unu progettu chi cheret minimare s’influentzia po s’ambiente e su cossumu de su terrinu. Un’elementu novu de custu pianu est sa metropolitana de supraffitzie, chi at arrivare in derettura a s’istadiu, garantinde una connessura lestra e agguantabile cun su restu de sa tzittade.

S’abbattimentu de su Ponte de sa Vittoria, chi fit prevedidu prima, est bistadu iscartadu dae su progettu po garantire agguantamentu e cabire su pretziu. Su crompimentu de s’istadiu novu cumportat un’ispesa totale de 200 milione de euros, cun 50 pagados dae sa Regione e 10 dae su comune de Casteddu. S’istadiu at a costare 12 miliones. “No si trattat de unu progettu ispeculadore” at nadu Todde, respundinde a critigas e condierras. S’iscartu de sas sumas chi fint prevedidas in d’unu primu tempus, in mesu de sas cales bi fint domos e buttegas, respundit a sa voluntade de minimare sas conseguntzias po s’iscrocca.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Einstein Telescope, sa Sardigna puntat supra Sos Enattos: un’istrumentu pro istudiare s’univressu.

S’Einstein Telescope est un’istrumento iscientificu addaenantis medas chi at a permittere a sos istudiosos de iscrudignare sas undas gravitatzionales chi arribant dae s’univressu primarzu e de istudiare sos fenomenos de su trettu chi oe non podimos ancora biere.

Si trattat de unu osservadoriu de ingendra nova chi nos at a podere azzuare a cumprendere menzus comente est naschidu e creschidu s’Univressu. Gratzias a sa dilighesa manna sua at essere possibbile iscrudignare abbenimentos cosmicos istravandos comente sa tumbada intre toffos nieddos o intre istellas de neutrones abbeniddos miliardos de annos faghet.

Sa Sardigna at a presentare ambas sas possibbiles formas de s’osservadoriu: cussa a triangulu e cussa cun duas istrutturas a forma de L. Carchi istudiu at mustradu chi sa soluzione cun duas L diat podere dare risurtados iscientifficos menzus e minimare carchi arriscu tennicu. S’idea est cussa de faghere custa solutzione imparis a sa Sassonia, creande una collaborassione intre Istados Europeos divressos supra unu de sos disignos iscientificos prus importantes de sos annos imbenientes.

Pro sos iscientziados su situ de Sos Enattos, in s’iscrocca de Luvula, est unu de sos logos menzus in su mundu pro fraigare custu osservadoriu. Est difattis una zura meda muttiga dae su puntu de bista sos terremotos e casi briva de cale si siat burdellu motivadu dae sas attividades de s’omine. In prus sa rocca presente sutta de terra est adatta meda a sos iscavos netzessarios pro fraigare sas istrutturas chi ant a accasazzare sos istrumentos iscientifficos.

Su fraigu suo diat podere mustrare un’occasione manna po s’iscrocca. Unu disignu comente custu podet battire imbestimentos novos e occasiones meda de formazione. Sa presentzia de s’osservadoriu diat podere favoressere sa creschida de sa chirca iscientifica e apparare possibilidades novas pro istudiantes,chircadores e tennicos chi tribagliant in sas zuras de s’iscientzia e de s’inzennieria.

Unu fraigu iscientificu gai importante diat podere battire beneffissios fintzas a s’accolomia locale. A inghiriu de su disignu diant podere naschere attividades novas ligadas a sa chirca, modernissassione e servitzios chi serbint pro accotzare unu tzentru iscientificu internatzionale mannu meda. In prus diat podere affortigare sa collaborassione intre universidades, tzentros de chirca e istitutziones europeas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22