Su Tzentru de Chirca, Isviluppu e Istudios Superiores in Sardigna at depositadu 15 software novos accanta sa SIAE, arricchinde s’elencu de sas solutziones tecnologicas suas giai presentadu cun 27 operas su mese de bennarzu passadu. Custos annoamentos abbratzant medas campos, mustrande s’impignu custante de su tzentru in s’isviluppu de istrumentos modernos.

In mesu de sos software presentados, unu de sos pius de signifficu est cussu chi serbit po ordiminzare sos oggettos chi faghent parte de sa Limba Italiana de sos Sinzos, una tecnologia pensada po mezzorare s’intrada a sas informatziones po sas pessonas chi no intendent. Fintzas su campu turisticu ad a tennere benefitzios de solutziones novas, cun assentos chi mezzorant sa presentatzione e su controllu de sas informatziones po sos bisitadores.

Dae sa parte de sa sustenibilidade ambientale, su CRS$ at isviluppadu unu software chi resessit a cumprendere sos effettos de su bentu supra s’ispartinadura de sas sustanzias chi alluant, contribbuinde gai a una menzus cumpresa e controllu de s’effettu ambientale. Un’atteru annoamentu est su disignu vettoriale supra cartinas zeograffigas, gratzias a interfaccias web de ingendras novas chi rendent pius fatzile s’istudiu de sos datos de s’ispaziu in pagu tempus.

Unu de sos appricos pius de interessiu est po su cantu a tenore, patrimoniu culturale chena corpus de sa Sardigna, reconnottu dae s’Unesco. Su software pemittit de isseperare chistiones multimediales de custu connottu musicale antigu e de los faghere biere supra ischermos mannos po mesu de interfaccia interattivas, offerrinde un’esperientzia chi istrasinat sa zente.

Atteros istrumentos depositados incluidint tecnologias po ghiare e biere temas multimediales(figuras, videos, ambientes e modellos 3D) supra videos pubbricos, addia sistemas po su controllu in su mattessi momentu de datos de s’Ispaziu 2D e 3D, chi serbint po progettare s’urbanistica e de s’iscrocca. Est bistadu fintzas disignadu unu software po creare logos de apparada personalizzados, finghinde e mezzorande percursos de bisitadores, cun applicatziones particulares po sos museos e sas apparadas.

Un’atteru passu in daenanti est mustradu dae sa possibilidade de importare e esportare modellos 3D in formadu istandard, garantinde sa cumpatibilidade cun sas bases de modellu printzipales.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22