S’Italia si approntat a un’atzocchiu dae s’Articu chi at a battire una minimada de sas temperaduras, bentu forte e cundissiones de su tempus contrarias supra una parte manna de s’Italia, icluidinde abba troccosa e puru niadas.

Una massa de aria fritta de issida artica chi arrivat dae su Polo Nord, at attraessare s’Europa prima de arrivare a su Mediterraneu, ingendrande unu mumujone chi at a influentzare su tempus italianu in sas dies chi ant a bennere, accansande sa Sardigna.

Secundu sos calculos, fintzas a su fine chida bi ant essere condissiones de istabbilidade, cun abba in tottue supra sas regiones de su tzentru e de su mesudie, in manera particulare dae sa parte de su Mare Adriaticu e su Mesudie de s’Italia. Giovia at essere sa die in sa cale at a proere de pius, cun s’abba chi si at a podere revertire in nie supra sos 900-1.200 metros in sos Appenninos e supra atteros montes. In su mattessi tempus, bentu pius frittu dae su Nord e dae sa parte nord orientale at a faghere minimare sa temperadura in su Nord de s’Italia.

Sappadu 7 de Nadale s’aria fritta at a arrivare a sas Alpes, bintrande in su Mediterraneu siat dae s’adde de su Rodanu chi dae sa janna de sa Bora. Custu movimentu at a intzidare unu pejoru de su tempus, cun nie supra sas Alpes,Prealpes e su notte, fintzas supra sas campuras de Piemonte, Lombardia, Veneto e Friuli.

Dominiga 8 de Nadale at a sinzare sa chima de sa temporada. S’aria fritta at a bintrare in su Mediterraneu, iscadenande bentos fortes de Maistrale e bentu africanu, cun corfos de bentu de pius de 90 km/h. Marettadas in sas costas de su Mare Tirrenu, in manera particulare Liguria, Toscana, Lazio, Campania e Sardigna.

Sas regiones de su tzentru e de su mesudie ant a essere corpadas dae abba cadria e temporadas, e sas temperaduras pius bassas ant a battire su nie supra so Appenninos, chi ant a divennere biancos supra sos 1.000 metros. Sa Sardigna at a biere issa puru nivadas in proradas, unu abbenimentu chi non si biede a s’ispissu chi in custu tempus de s’annu.

Sas prenettas narant chi su clima at a divennere semper pius arritzonidu cun s’incumintzu de sa chida chi intrat. S’aria dae s’Articu at a sighire a creare istabbilidade mescamente in su Mesudie e supra sa Sardigna, cun su nie chi at a podere arrivare giai dae sos 600-800 metros. Sas cundissione de s’iberru posca ant a podere torrare un’attera borta a su Nord, abberinde unu periodu de frittu forte supra totta s’iscrocca natzionale.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Lampidos de raggios X dae unu toffu nieddu: unu ballu de s’univressu mai bidu a innanti.

Unu fenomenu prenu de misteru at acciappadu s’attentzione de sos astronomos: unu toffu nieddu mannu meda chi bistat a 100 miliones de annos lughe, est bogande a fora lampos de raggios X cun d’una frecuentzia semper pius manna, un’accradiada chi no s’est mai bida prima in d’unu oggettu comente custu.

In solu duos annos sa frecuentzia de sos lampos est passada dae unu donzi degheotto minutos a unu donzi sette
minutos, unu cambiamentu chi dassat biere protzessos fisigos istravanados tribagliande in d’unu de sos logos pius urtimos de s’Univressu.

Su toffu nieddu in chistione tenet una massa de unu milione de bortas cussa de su Sole, e si acciappat a su tzentru de una galassia attesu meda. Sos lampos de raggios X sunt bistados nodados gratzias a su Telescopio Spaziale Xmm-Newton de s’Agenzia Spaziale Europea(ESA) e istudiados dae unu ballumene de chircadores ghiados dae Megan Masterson de su Massachusset Institute of Technology, cun su contribbudu de s’Istituto di Astrofisica Spaziale e Fisica Cosmica dell’Istituto Nazionale di fisica Nuckeare de Palermo.

Secundu s’istudiu, chi at essere pubbricadu supra su” magazine” de grandesa Nature, un’ispiegassione possibbile po custu fenomenu tiat podere essere po sa presentzia de una nana bianca. Custu oggettu color’e aera, su tzentru meda cumpattu de un’istedda oramai istudada, si tiada acciappare in d’una posissione critiga, meda accanta a su fundale de sos abbenimentos de su toffu nieddu, sa regione addia sa cale nemmancu sa lughe potet fuire.

Sa nana bianca , attirada dae sa potente fortza de sa gravidade de su toffu nieddu, tiada essere resistinde a su antreccoro totale gratzias a un’ecchilibriu precariu. Custu est bistadu possibile po sa perdida custante de sos pizos foranos suos, chi dant un’ispetzie de cuntraccolpu. Si custa possibilidade at essere cunfirmada, si tiat trattare de s’oggettu pius accanta mai nodadu a inghiriu de unu toffu nieddu. Secundu Matterson, s’influentzia intre sa nana bianca e su toffu nieddu ingendrat unu frussu de energia chi si bogat a campu in sos lampos de raggios X, semper pius frecuentes.

Su fenomenu tiat podere dare una crae po cumprendere menzus sos protzessos fisicos a curtzu de unu toffu nieddu. Addia de sos raggios X, sa possibile presentzia de sa nana bianca tiat podere fintzas produere undas gravitatzionales, signales diffitziles de collire ma chi si podent mesurare cun sos istrumentos adattos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22