S’Ozzastra di ammanitzat a un’istagione nova de creschida gratzias a unu pianu de imbestimentos chi non tenet cabidianos, e chi assinzat pius de 100 miliones de euro a s’iscrocca po s’accordu de isviluppu e unione 2021-2027. Custu programma est bistadu fattu po accolumare mancantzias istoricas e po favoressere un’isviluppu, cun interventos po s’attraessamentu, sanidade, impiantos po s’abba e balorimentu industriale.

Una parte importante de su dinari est destinada a su mezzoru de s’attraessamentu. Su sustentu e su ponnere in sicuresa de sos caminos de sas provintzas de su Nugoresu e de s’Ozzastra ant a tennere unu finantziamentu de 10,4 miliones de euros, un’interventu chi at a contribbuire a garantire una sicuresa pius manna.

Po sa sanidade, su pianu prevedit benes de signifficu po su mezzoru de sas istrutturas locales. S’Ispidale N.S. de sa Mercede de Lanusei at essere a su tzentru de duos interventos importantes: unu po s’antincendiu cun d’unu istantziamentu de 800.000 euros e su rennobamentu de su repartu de Meighina, cun 650.000 euros. Fintzas sa Domo de sa Salude de Tortolì at a tennere 650.000 euros po s’antincendiu, garantinde istrutturas pius siguras e funtzionales po sos tzittadinos.

Sa balorizzatzione de sos logos industriales est un’attera prioridade. S’ex fravica de su papilu de Arbatax at essere revertida cun su accabbamentu de sos impiantos cun 10 miliones de euros, su rennobamentu de sos volumenes industriales cun 6,3 miliones e sa creassione de unu sistema po podere torrare a usare sas abbas de iscarrigu mezzoradas, cun 5 miliones de euros. Tottu custu puntat a faghere divennere Arbatax unu polu po attraere initziativas industriales novas. In mesu de sos progettos pius novos, bi est su rennobamentu de s’impiantu de su cumpostaggiu in sa zura industriale de Tortolì.

Abbaidande a su tempus benidore, su programma prevedit atteros finantziamentos po mesu de bandos regionales po initziativas de cultura, de s’educatzione, de rennobamentu de sas tzittades e de s’ambiente. De prus, sa programmatzione nova de s’iscrocca, chi at a partire luego, promittit de amprariare sos interventos finantziados, faghinde partetzipare atteros campos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22