Pustis de sa binchida romana in s’assembrèa custituente de su novu Movimentu 5 Isteddas, sa presidente de sa Regione Sardigna, Alessandra Todde, torrat in sa terra sua cun “ balìa,galabera e sensu de comunidade”.

Sa leader de sas 5 Isteddas, chi at affortigadu su rolu suo intro de su rinnoadu M5S, evidentziat sa determina de giughere addaenantis solussiones tzertas po sos problemas de sa Sardigna e de sos abitantes suos.

“Torro cun d’unu ispiritu carrigu de galabera, cun d’una balìa rennoada e cun sa determina massima po tribagliare a solussiones tzertas po accomettare e resorvere sos problemas de sa Sardigna e de sos tzittadinos,” at decraradu sa presidente, affortigande su nuntzu chi at postu fintzas supra sos social. S’assemblea romana est bistada unu momentu detzisivu po su tempus benidore de su Movimentu 5 Isteddas, cun sa linia de Giuseppe Conte chi
at fattura partire unu cambiamentu detzisivu, iscancellande sa figura de su Garante Beppe Grillo.

In custu cuntestu, Todde si est cunfirmada una figura importante meda de su cursu novu de sos 5S, giughinde addaenantis una bisione de progressu chi fettat parte de su campu de tzentru-manca. In su mentres de s’interventu suo supra su cataffale de s’assembrèa, Todde at ribaidu s’importantzia de sos temas tzentrales po sa Sardigna, comente sa paga minima regionale e s’accreschimentu de su Reis, su reddidu de incluisione sotziale regionale.

Torrande a sa Sardigna, sa presidente at decraradu chi sa maggiorantzia chi ghiat sa Regione non solu est forte, ma est bessida affortigada dae s’esperientzia romana. “ Tenimos meda craras sas prioridades e sas linias de su programma nostru e non che ammos istesiare de unu millimetru dae sos temas supra sos cales ammos tentu sa cunfiantza de sas sardas e sos sardos” at cunfirmadu.

Todde at puru evidentziadu sa natura autonoma de s’alleantzia regionale, accrarande chi su M5S no at essere solu una penduliche de su PD. Impignada in Roma po partetzipare a unu addobiu supra sa violentzia contra sas feminas, Todde at ribaidu s’importantzia de tribagliare supra temas sotziales de fundamentu. In sas prioridades addurant s’accottu a sas familias, su cuntrastu a sas differentzias e s’attuatzione de politicas chi favoressant s’isviluppu de s’accolomia de sa Sardigna.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Su Carrasegare in Sardigna: ritos e caratzas antigas e identidade chentza tempus.

Su Carrasegare in Sardigna est meda prus de una festa in caratza. Est unu ritu de tottus chi affundat sas raighinas suas in tempos attesu meda, intritzinde connottu paganu, conas agrarias e devossione populare. Sas tzelebrassiones de carrasegare in s’isula si annodittant po sa presentzia de caratzas antigas, fattas in linna o suerzu, e de costumenes carrigos de signifficos ideales. Donzi bidda custoit su propiu Carrasegare, cun ritos e personalidades unigas, dassadas dae ingendra a ingendra e ligados in manera funguda a su tziclu de sa nadura e su mundu agropastorale.

Intre sas bogadas a campu prus nodidas bi est su carrasegare de Mamujada, in su coro de sa Barbagia. Inoche isfilant sos tzelebres Mamuthones e Issohadores, friguras prenas de misteriu chi incarnant unu ritu dae sa frigura forte. Sos Mamuthones, cun sas caratzas insoro nieddas e sos marratzos pesantes ligados a s’ischina, andant a daenanti cun passos lentos e ritimigos, cun su sonu cottu de sas campanas.

Accanta a issos si movent sos Issohadores, bistidos de ruju e biancu, chi cun d’una fune acciappant baltzigamente sos ispettadores, cun d’unu gestu de bonu auguriu.

In Otzana, in su Nugoresu, su Carrasegare est dominadu dae sas caratzas de sos Boes e Merdules. Sos primos mustrant sos animales, sos boes, mentres sos secundos incarnant sos meres insoro. Sa manifestassione est un bera e propria apparada de teatru a s’abbertu, chi mustrat s’appitzigu de cuntrastu e a su mattessi tempus vivu intre s’omine e sa nadura, intre istintu e controllu.

Atterettantu ammaghiante est su Carrasegare de Oroteddi, cun sos Thurpos, friguras trinas e imbruttadas cun foddine, chi ammentant massajos e pastores. S’aera insoro modesta po seperu, muttit sa fatiga de su tribagliu in sos campiles e s’asprighine de sa vida in campagna, mentres sa protzessione paret unu ritu de puriffigassione e de torrare naschere.

In su tzentru de Aristanis bi est sa Sartiglia, una de sas manifestassiones cun sos caddos prus antigas de su Mediterraneu. Inoghe su Carrasegare leat unu carattere ispettaculare e sulenne: parigliantes cun sas caratzas si affilant cun sos caddos po chircare de infertzire un’istedda appiccada in artu, in d’unu ritu chi ponet impare abbilesa, fortuna e sacralidade. Sa Sartiglia est unu mamentu tzentrale de s’identidade de sa tzittade e est sighida dae medas ispettadores .

Attività realizzata col contributo della Regione Sardegna — IMPRENTAS 2025-2026. LR 22/2018, art. 22