Su 25 de Sant’Andria, Die Internatzionale po che bogare sa violentzia contra sas feminas, nos ammentat cantu siat galu apprettosu accomettare cust’apprettu sotziale. In Sardigna, su fenomenu de sa violentzia de casta leat inghirios graves meda, cun d’unu accreschimentu de casos chi preoccupat e unu cuntestu culturale chi a s’ispissu mandat a daenanti abesos chi faghent dannu.

Sa violentzia contra sas feminas bessit a pizu in paritzas formas: fisiga, psicologica, sessuale e de s’accolomia. Sos mortorios contra sas feminas, chi sunt sa pius urtimas e drammatigas conseguentzias de sa violentzia de casta, sunt creschinde in manera drammatiga in s’isula. In sos urtimos sette annos, 28 feminas sunt bistadas bocchidas, sinnu de una problematica chi dimandat attentzione derettu derettu, e misuras pretzisas.

Non si tratta solu de numeros. Sa violentzia de casta est una chistione abbarbada in isviluppos de podere e controllu, agguantadas dae una cultura de sos omines chi medas bortas zustifigat o irmenguat sas responsabilidades de sos affraccadores. In Sardigna, abesos e cunvintziones farsas ligadas a su rolu de casta sighint a essere ispartos.

Una pertzentuale de signifficu de sa populatzione pensat chi sa femina potat essere, in carchi manera, responsabbile de sa violentzia patida. Atteros creent chi, in situassiones de difficultade economica, si depat dare prioridade a sos omines in su tribagliu. Custos tremesos faghent andare a daenanti unu tempus de discriminassione chi impedit sa paridade prena e su riconnoschimentu de sos dirittos de sas feminas.

Mancari esistant istrumentos po azzuare comente su numeru birde 1522, medas feminas no acciappant su corazu oppuru sas possibilidades po denuntziare. Sa timoria de no essere crettidas oppuru de patire atteras violentzias las ispinghet a suffrire a sa muda. In su 2022, su 74% de sas feminas chi at giammadu su servitziu, posca no at denuntziadu. Est de fundamentu affortigare custos istrumentos e indilighire sa populatzione supra s’importantzia de denuntziare sas violentzias.

Cumbattare sa violentzia de casta no cheret narrere solu de castigare sos faltosos, ma puru educare sa sotziedade a su rispettu e a sa paridade. Serbit un’impignu de tottus po isderenare sos abesos, favoressere s’agualidade de casta e fraigare una cultura chi siat fundada supra su rispettu pare-pare.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sardigna, unu modellu novu de continuidade aerea approbadu dae sa Cummissione.

Sa Cummissione Guvernu de s’Iscrocca de su Cunsizzu Regionale,ghiada dae Roberto Li Gioi(M5S), at dadu parrere arrimaderu a maggiorantzia, cun su tzentru dresta chi no at votadu, a su modellu novu de continuidade aerea chi est bistadu proponnidu dae sa Giunta Todde.

Pustis de aere intesu s’assessore a sos carrares Barbara Manca, su testu at a torrare cras in Giunta e at essere luego mandadu a su Mit po sa frimma de su decretu e po  essere pubbricadu in sa Gazzetta Uffitziale de s’Unione Europea. S’intentu est est de pubbricare su bandu intre su 29 de capudanni po faghere partire su serviziu novu dae  s’istiu 2026.

Sa continuidade at a durare battoro annos e at a tennere battoro fascas a die invetze de sas tres de como, pius frecuentzias, su controllu de sa disponibilidade cun sa possibilidade de azzunghere atteros bolos pagados dae sa Regione e cun tariffas pius bassas: su Casteddu-Roma po andare e torrare at a minimare dae sos 147 a sos 100 euros, cun atteros abbasciamentos de su 30% po sos piccioccos sutta de sos 14 annos e chentza pagare nudda po sos pizzinnos fintzas a sos duos annos chentza logu po si setzere. Sa numeru de chie at a tennere benefitzios at essere pius manna e at  incrudere militares,tribagliadores chi bistant in Sardigna,isportivos chi faghent parte de sotziedades isulanas, zente chi no bistat in Sardigna ma tenet parentes fintzas a su terzu gradu, chie tenet sa lezze 104 e sos tutores legales de sos chi istant in Sardigna.

In su bandu at essere cunsiderada menzus s’offerta tennica chi cussa accolomica po garantire sa calidade de su servitziu e bi at essere puru una cabbina de regia e unu controllu supra sa mobbilidade de s’iscrocca po regulare in donzi momentu sa continuidade nova. Sa porfia como po sa Sardigna at essere de traduire custa novidade in d’unu servitziu chi siat balidu e firmu abberu, capatze de rispondere a sas esigentzias de sos sardos e binchere sas crititzidades chi dae annos accumpanzant su dirittu a sa mobilidade de s’isula.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22