Sa zovana artista sarda Angelica Ibba, connoschida che Angie est pronta a che giughere su talentu suo, supra su cataffale de grandesa de su Festival de Sanremo. A solu 23 annos , sa cantadora chi arribat dae Uta, unu comune pitticcu de s’ala de Casteddu, est una de sas 24 semifinalistas de Sanremo zovanos 2024.

Unu puntu de arrivu importante meda, chi la biet partetzipare po unu de sos battoro postos riservados a sas propostas novas chi si ant a presentare po sa prima borta in Sanremo Zovanos.

Angie, tenet a sas palas suas unu caminu musicale giai prenu de esperientzias, sustentadu dae sa passione po sa musica chi l’accumpanzat fintzas dae cando fit pitzinna. Sos primos passos suos supra su cataffale sunt bistados in daenanti de unu pubbricu televisivu natzionale, gratzias a sa’intzidida in “Ti lascio una canzone” e “The voice of Italy”, chi ant dadu unu contribbudu mannu abberu a nde deffinire su modu e sa maduridade.

In Sanremo Zovanos, Angie si presentat cun sa cantone “Scorpione”, chi li permittit de iscumbattare su modu suo chi est unicu e sas dodas suas de sa boghe. Sa zovana cantadora est giai una boghe sighida meda in sos Social media, inube at conchistadu meda pubbricu cun sa cantone “Frasi mai dette”, unu singulu chi ets sonadu in TikTok e atteros logos digitales.

Gratzias a custu sutzessu, Angie est resessida a acciappare s’attentzione de unu pubbricu zovanu e attivu, ghiande sa musica sua addia de sos limides de s’isula in sa cale est naschida. S’isseperu po Sanremo Zovanos est bistadu tostu meda: de sos 564 partetzipantes, solu 46 artistas sunt bistados ammittidos a sas proas e, pustis de un’atteru isseperu, si est arrivadu a sos 24 semifinalistas, seperados dae sa cummissione musicale de sa cale est presidente Carlo Conti. Custa truppa espressat una parte de interessu de sa cantone nova italiana, cun artistas chi arribant dae donzi parte de s’Italia e chi battint imparis a issos cantones e maneras de cantare divressas.

A incumintzare dae su 12 de sant’andria, sos semifinalistas ant a partetzipare a chimbe addobios televisivos supra Rai2 presentados dae Alessandro Cattelan, chi ant a permittire a su pubbricu de connoschere menzus sos zovanos talentos e de iscurtare sas propostas musicales insoro. Ma su momentu detzisivu at arribare su 18 de su mese de nadale, cando supra de Rai1 bi at essere sa finale de Sanremo Zovanos. In cuss’occasione, Angie e sos atteros finalistas ant a battagliare po binchere unu de sos battoro postos po su Festival 2025.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22