Su zuighe de su tribagliu de su tribbunale de Nugoro at dae pagu reconnoschidu sa maladia proffessionale a unu ex trabagliadore de Orgosolo, chi aiat trabagliadu in sa fravica industriale de Otzana dae su 1974 asu 2015. S’omine, chi fit bistadu postu in isettu prima de sa pesione, est mortu su mese de frearzu passadu.

Sa sententzia, bogada a fora su 15 de santuaini pustis tempus meda”casi 8 annos” at cundennadu s’Inail a pagare a sa familia de su tribagliadore una rendida chi prevedid s’assigurazione chi tepent tennere tottu sos trabagliadores.

Su zuighe at istabilidu chi su linfoma de non Hodgkin follicolare e sa carentzia a sos prummones, causada dae s’asbestosi de s’incumintzu, funt ligados in manera deretta a su fattu chi su trabagliadore fit bistadu espostu a sustantzias chimicas perigulosas, commente benzene,nafta e trielina, chi si usaiant po cussu tribagliu. Custas sustantzias sunt bistadas cunsideradas commente sos printzipales motivos chi l’ant fattu ismalaidare fintzas a lu faghere morrere.

S’iscoperta de sa maladia, chi in d’unu primu momentu s’Inail aiat mandadu in daesegus in su 2016, est bistada reconnoschida gratzias a sas scruccullas cumplicadas meda chi ant fattu sos espertos. In mesu de sos documentos importantes, presentados in su protzessu, bi fit fintzas una relata iscientifica sos effettos dannosos de sa trielina.

S’Anmil, s’assotziu natzionale chi difendet sos invalidos e mucrados de su tribagliu, at tentu unu rolu importante po azzuare su trabagliadore e sa familia sua in su percursu legale. Mancari sa sententzia siat arrivada pustis chi su trabagliadore esseret giai mortu, sa viuda e sos fizzos ant a podere biere reconnoschidos sos dirittos insoro e de su trabagliadore.

Francesco Tolu, dirigente regionale de s’Anmil e chi faghet parte de su Cunsizzu Natzionala Amianto, at espressadu su dispiaghere suo po su ritardu de sa zustissia, ma at fintzas evidentziadu chi s’impignu de sa familia e de s’assotziu no est bistadu marriu.

Michele Tatti, presidente de Nugoro e dirigente natzionale de s’Anmil, at cunfirmadu chi s’assotziu at a dare semper azzudu a tottu sos trabagliadores e sos eredes insoro chi gherrant po ottennere su riconnoschimentu de sos dirittos insoro, mescamente in sos casos de sos problemas cun s’amiantu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Pink Floyd: mesu seculu e “Wish you were here” torrat a dominare sas classificas.

A chimbant’annos dae sa bessida sua originale de su 1975, Wish You Were Here” torrat a conchistare su bruncu de sas classificas italianas, cunfirmandesi commente unu de sos album prus conicos e influentes de s’istoria de su rock. Sa torrada a su primu postu arribat gratzias a una ristampa ispetziale po sos chimbant’annos, curada in manera particulare.

Custu modellu at attiradu s’interessiu de sos collessionistas, appassionados e ingendras novas de ascurtadores, mustrande comente un’album istoricu potat sighire a ingendrare galabera e interessiu a distantzia de casi mesu seculu.

Su sutzessu de s’album non si allindat solu a sa classifica generale, ma dominat puru sas classificas de sos discos, in manera particulare po viniles e CD de collessione, signu chi sa musica de sos Pink Floyd sighit a essere appretziada non solu comente esperientzia digitale, ma comente oggettu reale e de cultu. S’ammaju de s’album est ligadu non solu a sa calidade musicale e a sos testos fungudos, ma fintzas a sa simana in sa cale est bistadu ingendradu,periodu in su cale sa band britannica fuit iscumbattande fronteras novas sonoras e ideales, produinde un’opera chi ancora oe torrat a sonare po s’intensidade emotiva sua e po sa perfessione artistica de sos sonos.

Sa torrada a bogare a campu tzelebrativa de s’album at puru intzidiu dibattidos e analisis intre criticos e appassionados, meda de sos cales evidentziant comente su seperu de incluidire bootleg e materiales mai pubbricados permittat de cumprendere menzus su protzessu creativu de sa band e de bintrare in cuntattu cun sa musica in d’una manera prus funguda.

S’attentzione de sos media e su sutzessu cummerciale de s’album mustrant chi sa musica istorica podet ancora fittare in su mercadu de oe, faghinde de ponte intre su passadu e presente, intre nostalgigos e iscurtadores novos.

Attività realizzata col contributo della Regione Sardegna — IMPRENTAS 2024-2025 L.R. 22/2018, art. 22