Un’abbenimentu chi non capitaiat dae pius de 50 annos at battidu una bentada de gioia e cunfiantza in Semestene, unu burgu pitticcu in su coro de su Meilogu chi tenet solu 122 abitantes.A sas 22.00 de su 10 de Santuaini passadu, est naschida sa pitticca Landhe Yu, sa prima pitzinna naschida in domo in sa bidda dae su 1967.

S’emossione at trabentadu tottu sa comunidade, tantu chi su babbu e sa mama ant cherfidu comunicare a tottus cun d’unu cartellu postu in su passizu de domo, in su cuartieri Cantara Jana, cun d’una iscritta simple ma carriga de signifficu:”Est nada”. Landhe Yu est fiza de Antoni Sotgiu, naschidu in Semestene, e de Jaen, de naschida tzinesa. Su nomene suo, seperadu in manera simbolica, poned impare sa cultura sarda e orientale: “Landhe” cheret narrere lande in sardu, simbulu de fortza e resistentzia, mentres “Yu” est unu riferimentu a sos manneddos dae parte de sa mama, ligados a su mundu de su tzinema tzinesu.

Su seperu de faghere naschere sa pitticca in domo, est bistadu pesadu e poderadu dae unu team de mastras de partu espertas, Viola Usai e Silvia Collu, chi dae annos accumpanzant sas familias chi dezidint de faghere su partu in domo in Sardigna.

“Amos sighidu s’andantzia in ispidale, ma cherimis bivere su partu in domo cun s’assistentzia de sas nostras mastras de partu de cunfiantza”, at ispiegadu Antonio, espressande s’ingraenza sua po s’azzudu retzidu. Tottu sa comunidade at festadu s’arrivu de Landhe Yu, cun su sindigu Antonella Buda chi at espressadu sa gioia de tottus:” Donzi naschida est unu donu chi non si podet calculare, una promissa po su tempus benidore. In d’una bidda commente Semestene, chi biet sa populassione minimare, donzi vida nova tenet unu signifficu meda pius fungudu”.

Su sindigu at ammentadu chi s’urtima naschida in sa bidda est de un’annu faghet e chi cosas commente custa sunt semper pius raras in sos urtimos 50 annos: “S’arrivu de Landhe Yu battis s’isperantzia de una bida longa e galaverosa, circundada dae s’affettu de sa comunidade sua”.

Cust’istoria no appartennet solu a sa naschida de una pitzinna, ma puru a s’incontru de culturas divressas chi si abbarbant in d’unu angulu pitticcu de Sardigna. Supra su documentu de identidade de sa pitzinna bi at essere iscrittu unu fattu raru e de signifficu:Naschida in Semestene. Unu particulare chi at addurare signadu in s’istoria de su burgu, simbulu de su torrare a vida e de isperantzia po su tempus benidore.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Brevettes,Italia intre sas primas deghe in Europa: sinzales positivos mancari sa minimada.

Fintzas si si registrat una minimada pitticca in su numeru de sos brevettes, s’Italia resessit su mattessi a bintrare intre sos primos 10 Paisos in Europa. In su 2025,dittas e imbentores italianos ant presentadu 4.767 dimandas de brevettes, unu datu chi est minimadu de pagu cunfrontadu a s’annu passadu. Mancari custa minimada,peroe,s’Italia resessit a mezzorare sa posissione sua in sa classifica,arrivande a su postu 10 in su mundu e cunfirmandesi intre sos Paisos europeos prus attivos in custu campu.

Su campu chi si mustrat prus forte est cussu de sas carraduras e de sas macchinas, chi sighit a creschere mancari in su mentres atteros campos abbraccant.Appena pustis si agattant sas tennologias ligadas a sa movida de sas mertzes,comente sistemas de carradura e imballazu,sighidas dae macchina ispetziales e inzenneria tzivile. Unu cinnu positivu arribat fintzas dae sa creschida de su brevette unicu europeu, una cosa chi permittit de diffendere un’imbentu in prus Paisos cun d’una dimanda sola. Custa cosa faghet divennere simples sas protzeduras e minimat sos pretzios,facilitande pro sas ditta pitticcas e medias, ma fintzas pro sas universidades e tzentros de chirca, de tutelare sas ideas insoro e las ponnere in su mercadu.

Propriu in su campu de sa chirca pubbrica si annodittat su Cunsizzu Natzionale de sas Chircas, chi si cunfirmat intre sos interpretes printzipales in Italia e tenet unu bonu risurtadu fintzas a livellu europeu. Custu mustrat s’importantzia de sa chirca pubbrica po agguantare s’isviluppu e creare opportunidades novas. Mancari sos signales chi dant corazzu, addurant peroe difficultades. Sa minimada, mancari pitticca, in su numero de sos brevettes mustrat chi bi est ancora bisonzu de accomettare de prus sas dittas e sos imbentores, mescamente in d’unu campu internatzionale semper prus in cumpetissione. In prus,est de fundamentu minimare sas differentzia in sas zuras de s’Italia.

In tottu custu, s’Italia mustrat de tennere ancora capatzidades bonas in su campu de modernizzassione,resessinde a mantennere unu postu importante in Europa. Intamen, po mezzorare de prus at essere netzessariu imbestire de prus in sa chirca, accomettare sas dittas e azzuare sos zovanos a revertire sas ideas insoro in disignos chi si pottant faghere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22