Una die de devuccamentu e cunfrontu supra prevensione e conduisione de sos fogos, est bistada ordiminzada deris in Bitzi, po su Disignu Silvanus. S’addobbiu at bidu sa partecipatzione de ismastridos e membros de sas istitutziones locales, apprimu cun d’una accorrada de cherbeddu in su logu de su Parcu Tepilora e pustis cun esercitzios praticos in sa zura amparada de Crastazza.

In su mentres de sa manzanada, sos chi partetzipant a su disignu ant presentadu sos istrumentos novos chi ant isfroscadu, in mesu de sos cales bi est un’app po sinzalare in presse sos fogos, chi servat po sas istitutziones e po sos tzittadinos, po garantire de arrivare in presse e cun balentìa. Est bistadu evidentziadu su rolu importante meda de sas comunidades locales po su controllu e su sinzalu, gai commente in su recuperu de sos logos fartados dae sos fogos.

In su bortiadeddu, s’attenztione si est iscadappia supra su campu: in sa zura amparada de su Parcu Tepilora, ant fintu fogos e interventos gratzias a s’assistentzia de su CFVA, de sa Protessione Tzivile e de Forestas. Sas operassiones ant bidu fintzas sa partetzipazione de “droni” po sinzalare e s’interventu po istudadura de sos fogos e ponnere a postu sos terrinos.

Custa dimustrassione pratica at permittidu de mezzorare sas cumpetentzias de sos operadores e de sos tzittadinos presentes, faghindelos divennere parte attiva in sa protessione de su patrimoniu de sos buscos.

S’abbenimentu est postu intro de su disignu europeu Silvanus, finantziadu dae su programma Horizon 2020 Green Deal. Silvanus ponet impare 49 partners de tottu su mundu intre Unione Europea, Brasile,Indonesia e Australia, in mesu de sos cales, su Parcu de Tepilora, chi faghet de logu pilota po proare sas tecnologias novas creadas po prevennere e controllare sos fogos in sos buscos.

Sa base bene gurrida po su disignu usat tecnologias novas meda, big data, modellos de su tempus e videos “multispettrali” po controllare sas possibilidades de sos buscos, prevennere sos fogos e faghere cumprendere tottu custu a sas popolatziones locales. Sas attividades de su disignu si isfroscant in tres momentos: prevensione, regorta e attransu, cun s’intentu de mezzorare sa deffensa de sos buscos e de sas comunidades locales.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22